Cafodd plentyn pump oed ei gludo i’r ysbyty mewn ambiwlans awyr gydag anafiadau allai beryglu bywyd yn dilyn gwrthdrawiad ym Mhowys ddydd Sul.

Cafodd pum person eu hanafu’n ddifrifol yn y gwrthdrawiad rhwng tri char ar ffordd yr A4067, ger Craig-y-Nos am tua 17.50. Roedd hyn yn cynnwys y plentyn, sydd bellach yn sefydlog yn yr ysbyty.

Roedd car Ford Fiesta gwyrdd, Volkswagen Polo du a Vauxhall Grandland llwyd yn y gwrthdrawiad.

Cafodd gyrrwr y Ford Fiesta, dyn 39 oed, ei arestio ar amheuaeth o achosi anaf difrifol drwy yrru’n beryglus ac esgeuluso plentyn.

Daeth i’r amlwg yn ddiweddarach fod cerbyd arall, Ford Fiesta melyn, hefyd yn rhan o’r digwyddiad. 

Cafodd gyrrwr y cerbyd, dyn 65 oed, ei arestio ar amheuaeth o achosi anaf difrifol drwy yrru’n beryglus.

Mae’r ddau ddyn yn parhau yn y ddalfa.

Mae’r llu yn apelio am wybodaeth gan unrhyw yrwyr a oedd yn yr ardal ar adeg y gwrthdrawiad, neu sydd â lluniau camera dashfwrdd, i rannu gwybodaeth drwy ffonio 101.