Mae'r darlledwr Owain Wyn Evans wedi dechrau diwrnod olaf ei her feicio ar draws pedair gwlad y Deyrnas Unedig, gyda dros £2.6 miliwn eisoes wedi'i godi ar gyfer Plant Mewn Angen.

Mae'r cyflwynydd o Rydaman wedi bod yn beicio ers dydd Llun, gyda'r nod o deithio bron i 400 milltir drwy'r Alban, Gogledd Iwerddon, Lloegr a Chymru mewn pum niwrnod.

Fore Gwener, fe gyhoeddodd Sara Cox ar Radio 2 fod cyfanswm yr arian a godwyd wedi cyrraedd £2,603,220.

Dyma'r pellter hiraf i gael ei gyflawni fel rhan o her codi arian Radio 2 y BBC.

Y daith olaf i Gaerdydd

Fe ddechreuodd Owain gymal olaf yr her ym Mlaenafon fore Gwener, gyda'r bwriad o fynd drwy Ystrad Mynach a Chaerffili cyn gorffen yng nghanol Caerdydd.

Mae disgwyl iddo gyrraedd y brifddinas yn ystod rhaglen Vernon Kay ar Radio 2, sy'n cael ei darlledu o Gaerdydd fore Gwener.

Mae cannoedd o bobl wedi dod allan i gefnogi Owain ar hyd y daith, gan gynnwys torfeydd yn y Trallwng a Thalgarth.

Ddydd Iau, fe deithiodd o'r Trallwng drwy'r Drenewydd, Llandrindod, Llanfair-ym-Muallt, Talgarth a Chrucywel cyn cyrraedd Blaenafon.

Roedd y daith yn cynnwys un o ddringfeydd mwyaf heriol yr wythnos, sef y Tumble ger y Fenni.

Fe gafodd Owain gyngor gan enillydd y Tour de France, Geraint Thomas, cyn iddo fynd i'r afael â'r ddringfa.

Fe ddaeth cannoedd o bobl i'r dref i'w gefnogi, gyda dwy beiriant cloddio yn ffurfio siâp calon i'w groesawu.

Cyn iddo adael y dref fore Iau, fe gafodd ei wneud yn Arglwydd a Beili Anrhydeddus y Trallwng am y diwrnod gan faer y dref i gydnabod ei ymdrechion.

Miliynau wedi'u codi

Fe gyrhaeddodd y cyfanswm yr arian godwyd dros £1 miliwn ddydd Mercher, cyn cynyddu i dros £2.6 miliwn erbyn bore Gwener.

Nid dyma'r tro cyntaf i Owain godi arian ar gyfer Plant Mewn Angen.

Yn 2021, fe gododd dros £3.8 miliwn ar ôl chwarae'r drymiau am 24 awr yn ddi-dor fel rhan o'i her Drumathon.

Bydd rhaglen arbennig am ei daith yn cael ei darlledu ar BBC One ddydd Gwener 20 Tachwedd am 19:30.