Bydd y Brenin yn dechrau taith o amgylch y Caribî wrth i alwadau gynyddu arno i ymddiheuro am rôl Prydain mewn caethwasiaeth.

Bydd Charles yn dechrau ymweliad naw diwrnod â’r rhanbarth yn y Bahamas ddydd Mawrth.

Daw ar ôl i ysgrifennydd cyffredinol y Gymanwlad, Shirley Botchwey, ddweud yr wythnos diwethaf na fyddai’n “gwneud drwg” iddo ymddiheuro.

Dywedodd Arlywydd Guyana, Mohamed Irfaan Ali, yn ddiweddar mai ymddiheuriad gan Charles oedd “y cam nesaf”.

Fe fydd y Brenin yn llywyddu Cyfarfod Penaethiaid Llywodraethau’r Gymanwlad (CHOGM), sy’n cael ei gynnal bob dwy flynedd, yn Antigua. 

Yno, mae’r Brenin yn debygol o wynebu galwadau am ymddiheuriad a hefyd iawndal am gaethwasiaeth.

Yn ddiweddar, fe wnaeth yr Ysgrifennydd Tramor, Ed Miliband, bwysleisio safbwynt Llywodraeth y DU mewn cyfweliad â’r papur newydd digidol Politico.

Dywedodd: “Dydw i ddim yn credu mai iawndal yw’r ateb, ac rydw i eisoes wedi cael y trafodaethau hynny gyda rhai o’n cydweithwyr yn y Gymanwlad.”

Pan gyhoeddwyd manylion yr ymweliad yn gynharach y mis hwn, dywedodd llefarydd ar ran Palas Buckingham: “Mae trafodaethau pwysig yn cael eu cynnal mewn amryw o fforymau am etifeddiaeth trefedigaethedd ac effaith y fasnach drawsatlantig mewn pobl a gaethiwyd ar genedlaethau olynol.

“Er mai materion i lywodraethau fynd i’r afael â nhw yw’r rhain yn bennaf, mae datganiadau blaenorol Ei Fawrhydi arnynt wedi bod yn gwbl glir. Mae wedi eu disgrifio fel ‘erchyllter’ sy’n ‘staenio ein hanes am byth’.

“Felly ni fydd rhaglen yr ymweliad yn osgoi ‘dyddiau tywyllaf ein gorffennol’, fel y mae Ei Fawrhydi wedi eu disgrifio. 

“Ond, yn unol â dymuniadau’r gwledydd sy’n ein croesawu, bydd yn canolbwyntio’n bennaf ar fywyd bywiog pob gwlad heddiw a’i dyfodol addawol.”

Bydd Charles yn dechrau ei daith o amgylch y Caribî drwy ymweld â’r Bahamas rhwng 27 a 29 Hydref, cyn mynd ar ymweliad gwladol â Guyana rhwng 29 a 30 Hydref. 

Bydd yn mynychu CHOGM yn ystod ei ymweliad ag Antigua a Barbuda gyda’r Frenhines rhwng 1 a 4 Tachwedd.