Mae'r Dywysoges Catherine wedi rhannu neges yn y Gymraeg am y tro cyntaf wrth iddi hi a'r Tywysog William gyhoeddi neges Dydd Gŵyl Dewi.

Mewn fideo a gafodd ei chyhoeddi ar y cyfryngau cymdeithasol ddydd Sul mae Tywysog a Thywysoges Cymru yn dymuno Dydd Gŵyl Dewi hapus i bobl Cymru.

Cafodd y fideo ei recordio yn gynharach yr wythnos hon ar ystâd Windsor.

Mae'r fideo yn dechrau gyda William yn dweud: “I bawb yng Nghymru, Dydd Gŵyl Dewi hapus iawn."

Ychwanega Kate: “Mae Cymru yn agos iawn at ein calonnau ac rydyn ni’n edrych ymlaen at bob ymweliad.

“Mae’n wlad hyfryd gyda hanes cyfoethog a phobl wych," meddai William.

Yna mae Kate yn gorffen y neges trwy ddweud: “Dymunwn ddiwrnod llawn o ddathlu gyda theulu a ffrindiau.”

Yn gynharach yr wythnos hon roedd y ddau wedi ymweld â Llanidloes.

Yn ystod yr ymweliad fe wnaeth y ddau siarad gyda phlant oedd wedi creu addurniadau ar gyfer Dydd Gŵyl Dewi.