Mae dyn sydd wedi’i gyhuddo o ladd 15 o bobl mewn dathliad Hanukkah ar Draeth Bondi yn Awstralia wedi ymddangos yn y llys drwy gyswllt fideo o’r carchar am y tro cyntaf.

Mae Naveed Akram, 24 oed, yn wynebu 59 o gyhuddiadau yn ymwneud â’r saethu ar 14 Rhagfyr, gan gynnwys 15 cyhuddiad o lofruddiaeth, 40 cyhuddiad o anafu gyda’r bwriad o lofruddio, a throsedd derfysgol.

Mae’r heddlu’n honni iddo gyflawni’r saethu gyda chymorth ei dad, Sajid Akram, 50 oed, a gafodd ei saethu’n farw yn ystod yr ymosodiad.

Ymunodd Naveed Akram â’r gwrandawiad yn y llys yn Sydney o bell o garchar diogelwch uchel Goulburn Correctional Centre, yn ôl adroddiadau o gyfryngau Awstralia.

Gwisgodd Akram siwmper werdd a siaradodd i gadarnhau ei fod wedi clywed trafodaethau’r llys.

Dywedodd ei gyfreithiwr, Ben Archbold, wrth ohebwyr y tu allan i’r llys nad oedd yn gwybod eto sut y byddai’r diffynnydd yn pledio.

“Dydw i ddim wedi siarad ag e am yr ymosodiad yn benodol,” meddai.

“Y cyfan rydyn ni’n ei wneud ar hyn o bryd yw dechrau’r broses… rydyn ni’n aros i’r briff gael ei gyflwyno.

“Does dim byd arall y gallaf ei ddweud.”

Ychwanegodd Mr Archbold ei fod wedi ymweld ag Akram yn y carchar.

“Dim ond cleient ydyw, ac mae’n gleient sydd angen cael ei gynrychioli,” meddai.

“Ac nid ydym yn gadael i’n barn bersonol amharu ar ein rhwymedigaethau proffesiynol.

“Mae’r achos wedi’i ohirio, does gen i ddim mwy i’w ddweud.”