Mae’r Prif Weinidog yn ystyried rhoi sêl bendith i gynnydd sylweddol mewn gwariant ar amddiffyn, yn ôl ffynonellau o fewn Stryd Downing.

Mae’r llywodraeth wedi gosod targed o wario 3% o Gynnyrch Domestig Gros (GDP) ar amddiffyn ond mae hi bellach yn ystyried ei gyrraedd yn gynharach na’r targed gwreiddiol.

Fe wnaeth y Prif Weinidog addo gwario 2.5% o GDP ar amddiffyn erbyn Ebrill 2027, gan gynyddu’r gwariant i 3% erbyn tymor nesaf y llywodraeth.

Byddai cyrraedd y targed 3% bum mlynedd ynghynt yn costio tua £17.3 biliwn y flwyddyn, yn ôl y Swyddfa Cyfrifoldeb Cyllidebol (OBR).

Dywedodd Syr Keir Starmer yng Nghynhadledd Diogelwch Munich dros y penwythnos bod angen “gwario mwy, yn fwy buan, er mwyn mynd i’r afael â’r bygythiad ehangach”.

Dywedodd ffynonellau yn Downing Street fod y cynllun buddsoddi amddiffyn yn dal i gael ei gwblhau ac nad oedd penderfyniadau wedi’u gwneud.

“Mae llawer o ddyfalu amdano,” meddai ffynhonnell wrth y BBC.

Y llynedd fe wariodd y DU tua 2.3% o’i GDP ar amddiffyn, sef tua £66bn.

Mae’r DU – ynghyd â’r holl gynghreiriaid NATO eraill – wedi ymrwymo i wario 3.5% o’u GDP ar amddiffyn erbyn 2035.

Llun: Milwr o Fataliwn 1af, Catrawd Dug Lancaster. Llun gan Gareth Fuller.