Ni fydd modd i deithwyr ddefnyddio eu cardiau teithio ar TaithCymru, y gwasanaeth bws newydd rhwng Bangor a Chaerfyrddin.
Ym mis Awst eleni fe gadarnhaodd Llywodraeth Cymru y byddai'r gwasanaeth bws pellter hir yn dechrau gweithredu o ddydd Sul 25 Hydref.
Mae’r gwasanaeth yn un o ymrwymiadau 100 diwrnod cyntaf Llywodraeth Cymru ac yn rhan o’u bwriad i greu "rhwydwaith trafnidiaeth gyhoeddus mwy cydgysylltiedig."
Bydd TaithCymru, enw swyddogol y gwasanaeth newydd, yn cymryd rhwng pedair awr a thri chwarter a phump awr i gyrraedd pen y daith, gan alw yng Nghaernarfon, Porthmadog, Dolgellau, Machynlleth, Aberystwyth ac Aberaeron.
Mewn neges ar y cyfryngau cymdeithasol ddydd Iau, fe gyhoeddodd Trafnidiaeth Cymru eu bod wedi penodi cwmni Edwards Coaches mewn partneriaeth â Llew Jones Coaches i weithredu'r gwasanaeth newydd.
Mae wyth o fysiau newydd wedi cael eu prynu er mwyn rhedeg y gwasanaeth.
Er gwaethaf y croeso y mae cyhoeddi'r gwasanaeth hwn wedi'i gael ymysg teithwyr, mae rhai'n pryderu na fydd modd iddyn nhw ddefnyddio eu cardiau teithio.
Mae modd i rai teithwyr deithio am ddim ar y rhan fwyaf o wasanaethau bysiau yng Nghymru, neu gael teithio am bris gostyngol ar lawer o wasanaethau trenau.
Mae modd manteisio ar hyn os yw eich prif gyfeiriad yng Nghymru, ac eich bod naill a'n 60 oed neu'n hŷn, yn anabl neu'n aelod wedi'i anafu o'r lluoedd arfog.
Gall teithiau fod yn rhatach ar fysiau i bobl ifanc rhwng 16 a 21 oed, sy'n byw yng Nghymru, sydd gan amlaf yn ostyngiad o un rhan o dair o'r pris.
Ddim 'yn wasanaeth bws lleol'
Dywedodd llefarydd ar ran Trafnidiaeth Cymru: "Bydd TaithCymru yn gweithredu fel gwasanaeth coets lle y bydd angen archebu lle arno ymlaen llaw, gyda'i drefniadau tocynnau ei hun.
"O ganlyniad, ni fydd cerdyn teithio rhatach na gostyngiadau eraill sy'n bodoli eisoes yn ddilys ar wasanaethau TaithCymru.
Yn ôl Trafnidiaeth Cymru, fe fydd angen i gwsmeriaid brynu tocyn drwy system newydd fydd yn cael ei lawnsio cyn dechrau'r gwasanaeth:
"Er bod cerdyn teithio rhatach yn parhau i gael eu derbyn ar y rhan fwyaf o wasanaethau bysiau lleol yng Nghymru, gan gynnwys gwasanaethau TrawsCymru, mae TaithCymru yn gweithredu o dan fodel tocynnau gwahanol a gynlluniwyd yn benodol ar gyfer y gwasanaeth coets pellter hir hwn."
Dywedodd Llywodraeth Cymru na fydd modd "defnyddio tocynnau teithio rhatach" o dan y ddeddfwriaeth bresennol, am nad "yw'n wasasanaeth bws lleol".
Ychwanegodd mewn datganiad "rydym yn cydnabod y gallai hyn fod yn siomedig i rai teithwyr", ond ei bod wedi gofyn i Drafnidiaeth Cymru "gadw prisiau tocynnau yn fforddiadwy".
Fe ddywedodd y Llywodraeth ei bod am i Drafnidiaeth Cymru "sicrhau bod y trefniadau tocynnau yn gweithio'n dda i bawb, gan gynnwys pobl ifanc a phobl hŷn.”
Fe fydd y system prynu tocynnau newydd yn cael ei sefydlu ddydd Mawrth 6 Hydref, ac fe fydd modd archebu'r tocynnau ar-lein o flaen llaw.
Nid yw prisiau’r tocynnau wedi cael eu cadarnhau eto, ond byddan nhw’n cael eu cyhoeddi pan fydd y system archebu’n mynd yn fyw.
