Clywodd cwest fod dynes 75 oed o Dorfaen wedi cael ei tharo gan ei char ei hun wrth geisio achub cath.

Bu farw Jacqueline Davies ar ôl iddi blygu o flaen y cerbyd i achub cath pan fethodd y brêc ar lethr. 

Mae’r heddlu yn apelio am lygaid dystion i’r gwrthdrawiad ar Bryn Milwr, Hollybush, Cwmbrân tua 15:10 ddydd Llun 6 Gorffennaf.

Roedd Jacqueline Davies wedi dod allan o'r car i symud y gath i le diogel ac fe rowliodd y car yn ei flaen. Bu farw yn yr ysbyty'r diwrnod canlynol. 

Cafodd y cwest ei ohirio tan fis Ebrill.

Dywedodd ei theulu mewn datganiad ddydd Mercher bod eu “torcalon y tu hwnt i eiriau ar ôl colli ein mam annwyl Jacqueline Davies, 75 oed, mor sydyn”. 

“Roedd yn fam gref, annibynnol, llawn bywyd nad oedd byth yn ofni dweud ei barn, a dyna oedd un o’r nifer o bethau roedden ni’n eu caru amdani.

"Roedd hi’n onest, yn benderfynol ac yn llawn cymeriad, ac roedd ganddi gryfder a oedd yn ysbrydoliaeth i’r bobl o’i chwmpas.

"Mae ein teulu wedi’i lethu gan dristwch a fydd bywyd byth yr un fath hebddi hi. Rydyn ni’n ceisio ymdopi gyda’r hyn sydd wedi digwydd ond rydyn ni hefyd yn daer eisiau gwybod beth ddigwyddodd."

Mae swyddogion sy’n ymchwilio i’r gwrthdrawiad eisiau siarad ag unrhyw fodurwyr a oedd yn teithio yn ardal Bryn Milwr, Hollybush a allai fod wedi gweld y cerbyd neu’r gwrthdaro rhwng 10:00 a 10.30 ddydd Llun 6 Gorffennaf.