Fe fydd munud o dawelwch yn cael ei gynnal cyn gêm bêl-droed yn y gogledd ddydd Sadwrn, er cof am ddyn 25 oed a fu farw yn Llanelwedd nos Sadwrn diwethaf. 

Bu farw Dewi Evans, 25 oed o Lanfihangel Glyn Myfyr, Corwen, mewn maes carafanau ger safle'r Sioe Fawr yn Llanelwedd.

Fe gafodd tri dyn eu harestio ar amheuaeth o droseddau yn ymwneud â chyffuriau, ond fe ddywedodd yr heddlu ddydd Mawrth eu bod nhw bellach wedi eu rhyddhau ar fechnïaeth. 

Fe fydd Clwb Pêl-droed Cerrigydrudion yn cynnal munud o dawelwch er cof am Mr Evans yn eu gêm ddydd Sadwrn.

Mewn datganiad ddydd Iau, dywedodd y clwb: "Mae pawb yn y clwb yn hynod drist o gloed am farwolaeth Dewi. Roedd Dewi yn ffrind i lawer sydd yn gysylltiedig â'r clwb a roedd yn dod i wylio yn rheolaidd ar brynhawn Sadwrn i gefnogi'r tîm, heb anghofio'r hwyl yn y dafarn wedyn. 

"Mae ein meddyliau gyda'i deulu a ffrindiau yn ystod yr amser caled yma. 

"Mi fyddwn yn cael munud o dawelwch dydd Sadwrn yma cyn y gêm yn erbyn Kerry i gofio am Dewi. 

"Cysga'n dawel Dewi."

Cafodd Heddlu Dyfed-Powys eu galw i faes carafanau ar Fferm Penmaenau yn Llanelwedd am tua 22:30 nos Sadwrn diwethaf. 

Er gwaethaf ymdrechion parafeddygon, bu farw Mr Evans yn y fan a'r lle.