Mae’r heddlu wedi cadarnhau mai corff dynes gafodd ei ganfod mewn fan oedd ar dân yn Sir Ddinbych nos Sul, wrth i'w hymchwiliad i lofruddiaeth bosib barhau.

Mae’r swyddogion sy’n ymchwilio i’r digwyddiad ar Lôn Gas Works, Prestatyn, yn parhau i holi dyn 38 oed a gafodd ei arestio ar amheuaeth o lofruddio.

Fe gafodd yr heddlu ganiatâd nos Fawrth i’w gadw yn y ddalfa am gyfnod hirach.

Cafodd archwiliad post-mortem gan y Swyddfa Gartref ei gynnal ddydd Mawrth ar y corff a gafodd ei ganfod yn y fan, gan arwain at y cadarnhâd bod y dioddefwr yn fenyw ac yn oedolyn.

Nid yw’r corff wedi cael ei adnabod yn ffurfiol eto, ac mae’r heddlu yn gofyn i bobl beidio â dyfalu ar y cyfryngau cymdeithasol ynglŷn â phwy yw hi.

Mae’r crwner wedi cael yr wybodaeth ddiweddaraf, medden nhw.

Dywedodd y Ditectif Brif Arolygydd Zoie Dunkerley: “Rwy’n deall y bydd y digwyddiad hwn wedi achosi pryder yn y gymuned leol, a bydd ein swyddogion yn parhau i fod yn weladwy yn yr ardal os bydd angen i unrhyw un siarad â ni.

“Hoffwn ddiolch i’r aelodau o’r cyhoedd sydd eisoes wedi cysylltu â ni.

“Ond os oes gennych unrhyw wybodaeth a allai helpu ein hymchwiliad, ac nad ydych eisoes wedi siarad â ni, cysylltwch drwy ein gwasanaeth sgwrsio byw ar y we neu drwy ffonio 101 gan ddyfynnu’r cyfeirnod 26000816112.”