Mae dyn sydd wedi’i gyhuddo o lofruddio’r gwleidydd Ann Widdecombe wedi ymddangos yn y llys ar gyhuddiad o gynllwyn terfysgol yn erbyn arweinydd Reform UK, Nigel Farage.

Mae Joshua Kerry, 28, wedi’i gyhuddo o un drosedd o baratoi gweithredoedd terfysgol. 

Mae’r cyhuddiad yn ymwneud â gweithgarwch honedig rhwng 31 Mai 2024 ac 8 Gorffennaf 2026, meddai yr uned Plismona Gwrthderfysgaeth (CTP) ddydd Gwener.

Yn ôl dogfennau’r llys, mae wedi’i gyhuddo o ymchwilio i nifer o bobl amlwg ac unigolion eraill, gan gynnwys cyfeiriad cartref Nigel Farage.

Yr honiad yw ei fod wedi teithio i gartref Mr Farage ar 20 Ebrill y llynedd. Daeth partner Mr Farage, Laure Ferrari, adref i ganfod difrod i’r drws a photel o hylif tanio yn y porth.

Roedd Kerry yn gwisgo tracwisg lwyd wrth ymddangos yn Llys Ynadon Westminster ddydd Mercher. Siaradodd i gadarnhau ei enw yn unig.

Bu farw llefarydd Reform UK a’r cyn-weinidog Ceidwadol Ann Widdecombe, 78, ar 8 Gorffennaf ar ôl cael ei tharo ar ei phen â morthwyl 21 o weithiau yn ei chartref yn Haytor ar Dartmoor, Dyfnaint, yn ôl tystiolaeth mewn gwrandawiad llys blaenorol.

Mae Kerry, o Byrley Road, Rotherham, De Sir Efrog, hefyd wedi’i gyhuddo o’i llofruddio.

Ym mis Awst, fe wnaeth yr heddlu gwrthderfysgaeth ailagor ymchwiliad a oedd wedi para blwyddyn i ymosodiad honedig ar gartref Mr Farage yn ne Llundain.

Dywedodd yr Heddlu Metropolitan a CTP Llundain eu bod wedi ymchwilio i’r digwyddiad fel “ymgais i fyrglera (burglary)”. 

Ni chafodd neb ei arestio cyn i’r achos gael ei gau.

Bydd Kerry yn ymddangos nesaf yn yr Old Bailey ddydd Gwener.