Mae'r Arlywydd Trump wedi dweud  ei fod yn ystyried arafu'r gweithredoedd milwrol yn erbyn Iran.

Mewn datganiad ddydd Gwener, fe ddywedodd Arlywydd UDA: "Rydym ni'n dod yn agos iawn bellach i gwrdd â'n hamcanion wrth i ni ystyried arafu ein hymdrechion milwrol yn y Dwyrain Canol mewn perthynas â Chyfundrefn Derfysgol Iran."

Wrth gyfeirio at Gulfor Hormuz, ychwanegodd Trump bod angen iddo gael "ei amddiffyn a'i blismona gan Genhedloedd eraill sy'n ei ddefnyddio - nid yw America yn ei ddefnyddio."

Mae Iran wedi cau'r culfor yn sgil y rhyfel rhwng y wlad ac America ac Israel. 

Culfor Hormuz yw un o brif lwybrau masnach strategol y byd ac mae'n hanfodol i ddosbarthu olew.

Dywedodd Trysorlys America y bydd yn codi sancsiynau dros dro ar olew Iran sydd ar y môr ar hyn o bryd, gan ganiatáu iddo gael ei werthu i'r rhan fwyaf o wledydd er mwyn cadw prisiau olew i lawr.

Dros nos, fe gafodd ymosodiadau newydd eu lansio gan Israel ar Tehran a Beirut.

Mae Kuwait a Saudi Arabia hefyd wedi adrodd am ymosodiadau taflegrau neu ddronau dros nos.