Ar ôl i'r gwasanaethau brys ymateb i dân sylweddol mewn adeilad yng Nghaernarfon nos Wener, mae'r tân bellach wedi ei ddiffodd.

Roedd sawl fideo ar y cyfryngau cymdeithasol yn dangos tân yn llosgi mewn adeilad dros ffordd i Dafarn y Porth (Wetherspoons) ar Stryd y Porth Mawr yn y dref nos Wener.

Mae'r fideos yn cynnwys clipiau o fflamau'n codi o flaen yr adeilad.

Nid oes adroddiadau hyd yma fod neb wedi eu hanafu.

Mae Newyddion S4C wedi cysylltu â Gwasanaeth Tân ac Achub Gogledd Cymru a Heddlu'r Gogledd am ragor o wybodaeth.