Mae galw ar gorau ledled Cymru i gymryd rhan yng Nghôr y Byd wrth iddo ddychwelyd i Gaerdydd am y tro cyntaf ers dros 30 mlynedd.

Bydd hyd at 20,000 o gantorion 16 oed a hŷn yn dod ynghyd ar gyfer y côr torfol yn Stadiwm Principality ym mis Mai 2027.

Bydd y digwyddiad yn rhan o Ŵyl Gwlad y Gân, sef gŵyl newydd o ganu torfol fydd yn cael ei chynnal yn y stadiwm rhwng 6 a 9 Mai.

Bydd digwyddiad Young Voices Cymru hefyd yn cael ei gynnal yn ystod yr ŵyl, gan ddod â hyd at 15,000 o blant rhwng 7 a 14 oed at ei gilydd yn Stadiwm Principality.

Mae gwahoddiad i gorau o bob maint gofrestru eu diddordeb i gymryd rhan, gyda miloedd o gantorion eisoes wedi cofrestru.

Image

Cafodd Côr y Byd ei gynnal yng Nghaerdydd yn wreiddiol ym 1992 ac eto ym 1993, pan ddaeth corau o Gymru a thu hwnt ynghyd ar gyfer cyngherddau torfol ym Mharc yr Arfau.

Perfformiodd Tom Jones gyda chôr o tua 10,000 o gantorion yn y cyngerdd ym 1992, tra bod Shirley Bassey wedi perfformio yn yr ail gyngerdd flwyddyn yn ddiweddarach.

Yn ôl y trefnwyr, bydd y rhaglen yn cynnwys caneuon Cymreig traddodiadol, cerddoriaeth werin a phop, yn ogystal â chaneuon o ffilmiau a sioeau cerdd.

Cynhelir Gŵyl Gwlad y Gân mewn partneriaeth â Stadiwm Principality, Kilimanjaro Live, Caerdydd Dinas Cerddoriaeth, Llywodraeth Cymru a Croeso Cymru.