Mae Heddlu Dyfed-Powys yn ymchwilio yn dilyn marwolaeth dyn mewn gwrthdrawiad ym Mhowys.

Fe ddigwyddodd y gwrthdrawiad rhwng dau gerbyd ar ffordd yr A489 ger Caersŵs am tua 10:00 fore dydd Sul, 30 Awst.

Roedd y gwrthdrawiad rhwng Honda Civic llwydfelyn a cherbyd nwyddau trwm Renault gwyn. 

Cafodd y dyn oedd yn gyrru'r Honda Civic ei gludo i'r ysbyty mewn ambiwlans awyr. 

Bu farw'n ddiweddarach. 

Mae ei deulu wedi cael gwybod am y farwolaeth a bydd swyddogion arbenigol yn parhau i'w cefnogi meddai'r heddlu.

Mae'r heddlu bellach yn apelio am unrhyw un sydd â gwybodaeth, neu ddeunydd fideo o gamera dash-cam neu CCTV a allai eu helpu gyda'u hymchwiliad i gysylltu gan ddyfynu'r cyfeirnod 26*710871