Rhybudd: Gall cynnwys yr erthygl hon beri gofid

Mae dyn o'r Rhondda wedi cael ei garcharu am ddegawdau am droseddau rhyw hanesyddol, gan gynnwys treisio dau ddioddefwr oedd o dan 16 oed.

Cafodd Ceri Williams, 71 oed, o Ferndale, ei ddedfrydu yn Llys y Goron Abertawe yn gynharach yr wythnos hon.

Cyflawnodd Williams rai o'i droseddau yn ei fan hufen iâ - gan orfodi ei ddioddefwr ifanc i gymryd rhan mewn gweithgareddau rhywiol tra roedd ar ei rownd.

Roedd wedi ei gael yn euog ar ddiwedd ei achos llys o 15 cyhuddiad yn ymwneud â threisio plentyn, ymddygiad anweddus gyda phlentyn, ymosodiad anweddus ar blentyn, a chymryd rhan mewn gweithgaredd rhywiol gyda phlentyn.

Roedd un o'i ddioddefwyr wedi dioddef ymgyrch o gamdriniaeth a barhaodd am flynyddoedd.

Cafodd hyn effaith ddinistriol ar yr unigolyn flynyddoedd yn ddiweddarach.

Deffro'n sgrechian

Mewn datganiad a ddarllenwyd yn y llys, dywedodd un dioddefwr ei fod wedi colli'r gallu i ymddiried mewn pobl, ei fod yn dioddef atgofion byw o'r digwyddiadau, ac yn deffro gan sgrechian yng nghanol y nos.

Disgrifiodd un ddioddefwraig sut yr oedd hi'n teimlo'n hollol ddi-deimlad ers y profiad gan arwain at gyfnodau o rwbio ei chroen nes iddo waedu, ac ymolchi mewn hylif diheintio 'bleach'.

Cafodd Williams ddedfryd o 25 mlynedd, gan ei fod yn droseddwr sy'n achosi pryder penodol i'r awdurdodau.

Bydd hyn yn cynnwys 24 mlynedd dan glo, ac yna cyfnod ar drwydded o flwyddyn. 

Fe fydd yn cael gwneud cais am barôl ar ddiwedd dwy ran o dair o'r rhan o'r ddedfryd sy'n ymwneud â'r ddalfa, sy'n golygu y bydd yn 87 oed cyn y bydd modd ystyried ei ryddhau.

Dywedodd y Ditectif Gwnstabl Ceri Davies o Heddlu De Cymru: “Fe ddioddefodd dioddefwyr Ceri Williams y troseddau mwyaf erchyll dros nifer o flynyddoedd.