Mae dyn 57 oed wedi ei gael yn euog o geisio llofruddio menyw mewn parc yng Nghaerfyrddin ym mis Ionawr. 

Fe wnaeth James McKenna bledio'n euog yn flaenorol i fod â llafn yn ei feddiant mewn man cyhoeddus ac anafu gyda bwriad, ond roedd yn gwadu ei fod wedi ceisio llofruddio wedi iddo drywanu ei gyn-bartner ym Mharc Caerfyrddin. 

Fe dderbyniodd yr heddlu adroddiad fod dyn wedi trywanu menyw sawl gwaith am tua 16:00 ar 29 Ionawr. 

Fe wnaeth McKenna ffoi o'r digwyddiad, ac fe wnaeth yr heddlu lansio ymgyrch chwilio eang er mwyn dod o hyd iddo a'i arestio. 

Fe gafodd McKenna ei arestio ar amheuaeth o geisio llofruddio ar 2 Chwefror yn Aberystwyth. 

Cafodd ei gyhuddo yn ddiweddarach a'i gadw yn y ddalfa. 

Ddydd Llun, fe wnaeth y rheithgor ddyfarnu fod McKenna yn euog o geisio llofruddio, ac fe fydd yn cael ei ddedfrydu ar 2 Medi. 

Dywedodd yr uwch swyddog ymchwilio, y Ditectif Brif Arolygydd Sian Davies: “Hoffwn ddiolch i’r gymuned leol am eu cefnogaeth yn ystod cyfnod hynod o ofidus i bobl Caerfyrddin, a thu hwnt.

"Mae digwyddiadau o'r natur yma yn hynod o brin yn ein hardal ni, ac rydym yn parhau wedi ein hymrwymo i fynd i'r afael â thrais yn erbyn menywod. 

"Fe wnaeth gweithredoedd James McKenna y diwrnod hwnnw ddangos y lefel syfrdanol o drais a oedd wedi’i gynllunio o flaen llaw a allai fod wedi arwain yn hawdd at farwolaeth y dioddefwr. 

"Dwi'n estyn fy niolch i’r rheithgor am eu dyfarniad yn yr achos hwn.

"Dwi'n gobeithio y bydd canlyniad heddiw yn rhoi rhywfaint o sicrwydd i’r dioddefwr wrth iddi ddechrau symud ymlaen â’i bywyd."