Mae gan Gymru "yr hyder" i wella ar eu perfformiadau diweddar wrth iddyn nhw wynebu Norwy nos Iau, meddai Ethan Ampadu.

Dywedodd y chwaraewr canol cae fod Cymru "heb fod yn nhw eu hunain" yn y gemau diwethaf yn erbyn Portiwgal a Denmarc.

Fe gollodd tîm Craig Bellamy eu dwy gêm agoriadol yng Ngrŵp A Cynghrair y Cenhedloedd UEFA heb sgorio gôl.

Cyn ymweliad Erling Haaland a Norwy â Chaerdydd nos Iau, dywedodd Ampadu bod gan y garfan y gallu i wella ar eu perfformiadau.

"Dydych chi ddim yn y cyfarfodydd tîm na'r ystafell newid, ond os ydych chi'n edrych ar y ffordd rydyn ni'n hyfforddi a pharatoi, byddwch chi'n gweld y ffydd sydd gennyn ni yn yr hyn 'dyn ni'n gwneud," meddai.

"Pan chi'n profi'r cyfnodau a chanlyniadau anodd, efallai ei fod yn naturiol i'r rhai sy'n edrych o'r tu allan gwestiynu.

"Ond un peth rydyn ni'n dda am ei wneud, hyd yn oed yn ystod gemau heriol, yw dangos gwytnwch ac aros gyda'n gilydd.

"Rydyn ni'n gwybod bod ni heb fod yn ni ein hunain yn y gemau diwethaf, ac mae gennyn ni'r hyder ar draws y garfan ein bod ni'n gallu gwella ar hynny."

Image

Dyw Cymru heb ennill un o'u chwe gêm gystadleuol ddiwethaf dan Craig Bellamy.

Wrth siarad â'r wasg, dywedodd rheolwr Cymru ei fod yn deg bod cwestiynau yn codi am y safon yn ystod y gemau diwethaf.

"Os 'dych chi ddim yn ennill ac yn colli pedair gêm yn olynol, dylai cwestiynau gael eu gofyn," meddai.

Fe gyrhaeddodd Norwy rownd yr wyth olaf yng Nghwpan y Byd dros yr haf, gan golli 2-1 yn erbyn Lloegr yn y pen draw.

Maen nhw wedi ennill yn erbyn Denmarc a cholli yn erbyn Portiwgal yn eu hymgyrch yng Nghynghrair y Cenhedloedd hyd yma.

Er gwaethaf eu canlyniadau siomedig diweddar, mae Ethan Ampadu yn credu y gall Cymru guro Norwy os ydyn nhw'n gallu chwarae i'r safon disgwyliedig.

“Rydyn ni eisiau ennill, ond rydyn ni hefyd eisiau perfformiad y gallwn ni fod yn falch ohono,” meddai.

“Yn y gemau diweddar, dydyn ni ddim wedi edrych fel ni ein hunain. Dydy hynny ddim wedi bod yn adlewyrchiad o’n hunaniaeth ni, nac o’r hyn rydyn ni’n dda am ei wneud, ac nid dyna wnaeth ennill dyrchafiad i Gynghrair A i ni yn y lle cyntaf.

“Bydd buddugoliaeth yn naturiol yn rhoi hwb i hwyliau pawb, ond mae’n rhaid i hynny fynd law yn llaw â pherfformiad sy’n adlewyrchu pwy ydyn ni go iawn.”