Mae dau ddyn wedi eu carcharu am gyfanswm o bron i 20 mlynedd yn dilyn tri digwyddiad o losgi bwriadol ym Mhontypridd a Chaerffili.

Cafodd Yasin Hussain, 18 oed,  ac Adam Taylor-Morris, 19 oed, ill dau eu carcharu am naw mlynedd a naw mis yr un yn Llys y Goron Caerdydd ddydd Llun.

Mewn gwrandawiad blaenorol, plediodd Hussain yn euog i dri chyhuddiad o losgi bwriadol gyda'r bwriad o beryglu bywyd. 

Plediodd Taylor-Morris hefyd yn euog i'r un cyhuddiadau.

Teithio o'r Alban

Cafodd Hussain a Taylor-Morris eu gyrru i lawr o'r Alban ar ddiwrnod y digwyddiadau gan chwaer Taylor-Morris, Danni Taylor.

Digwyddodd y digwyddiad cyntaf ar Heol Porcher yn Glyncoch tua 04:00 ar fore Llun, 1 Mehefin 2026. 

Cafodd y teulu yn y tŷ eu deffro pan chwalwyd ffenest yr ystafell fyw gan fricsen.

Yna, cafodd bom petrol "coctel Molotov" ei daflu gyda'r bwriad o'i anelu drwy'r ffenest oedd wedi ei thorri.

Chwalodd ar y llawr y tu allan i'r tŷ. 

Ffoi mewn tacsi

Fe wnaeth Hussain a Taylor-Morris ffoi o'r lleoliad cyn dal dacsi i ardal Caerffili.

Digwyddodd yr ail ddigwyddiad yng Nghaerffili tua 07:00 ar yr un diwrnod, pan daflwyd bricsen trwy ffenest mewn tŷ ar Ffordd Wallis. 

Yna taflwyd potel wydr yn llawn petrol trwy'r ffenestr; ac aeth y botel ar dân wrth daro'r llawr. 

Cafodd y tân hwn ei ddiffodd yn gyflym.

Yna fe aeth y ddau ddyn mewn tacsi i'r trydydd digwyddiad, a ddigwyddodd tua 09:00 yr un diwrnod mewn eiddo ar Gilgaint Pearson yn Glyncoch. 

Cafodd Hussain a Taylor-Morris eu gweld yn crwydro o gwmpas am sawl munud cyn agosau at yr eiddo. 

Tra roedd Taylor-Morris yn ffilmio ar ei ffôn, taflodd Hussain goctel Molotov trwy ffenestr agored yr ystafell fyw, gan achosi i'r ystafell fynd ar dân.

'Bwriadol a pheryglus'

Dywedodd y Ditectif Gwnstabl Connor Michaels o Heddlu De Cymru: “Roedd y rhain yn ymosodiadau llosgi bwriadol a pheryglus a allai fod wedi arwain at ganlyniadau trychinebus, gan gynnwys anafiadau difrifol neu golli bywyd.

"Mae’r dedfrydau a roddwyd yn adlewyrchu difrifoldeb gweithredoedd y troseddwyr, a gobeithiwn y byddant yn rhybudd na chaiff ymddygiad mor fyrbwyll ei oddef. 

"Hoffem hefyd ddiolch i Heddlu’r Alban a Heddlu Gwent am eu cymorth trwy gydol yr ymchwiliad.”

Bydd Danni Taylor, 24 oed, o Perth a Kinross - a blediodd yn euog i gymryd rhan yng ngweithgareddau troseddol grŵp troseddau trefnedig - yn cael ei dedfrydu yn ddiweddarach.