Arestio dynes ar ôl i bedwar dyn gael eu trywanu yng nghanol Llundain
Mae dynes wedi cael ei harestio ar ôl i bedwar dyn gael eu trywanu yn Covent Garden yng nghanol Llundain, yn ôl Heddlu'r Met.
Cafodd y pedwar dyn eu cludo i ganolfan drawma fawr yn dilyn y digwyddiad ar Stryd Endell brynhawn Mercher.
Dywedodd Heddlu'r Met fod y dynion, sy'n 34, 39, 42 a 52 oed, wedi'u canfod gydag anafiadau trywanu.
Cafodd y dynion eu cludo i'r ysbyty, lle mae dau yn parhau i dderbyn triniaeth am anafiadau nad ydynt yn peryglu eu bywydau.
Mae'r ddau ddyn arall bellach wedi cael eu rhyddhau o'r ysbyty.
Cafodd dynes, sy'n 47 oed, ei harestio ar amheuaeth o feddu ar arf ymosodol ac o ymosod.
Mae hi wedi cael ei chludo i'r ddalfa.
'Digwyddiad unigol'
Yn ôl Heddlu'r Met, y gred yw bod y digwyddiad yn "ymwneud ag iechyd meddwl", gyda swyddogion yn dod o hyd i siswrn ar y safle.
Dywedodd llefarydd ar ran Gwasanaeth Ambiwlans Llundain: "Fe wnaethom anfon criw ambiwlans, parafeddyg mewn car ymateb cyflym a swyddog ymateb i'r digwyddiad. Fe wnaethom hefyd anfon Ambiwlans Awyr Llundain.
"Fe wnaethom drin pedwar claf yn y fan a'r lle cyn mynd â nhw i gyd ar frys i ganolfan drawma fawr."
Yn gynharach, roedd Heddlu'r Met wedi dweud bod tri pherson wedi cael eu trywanu.
Ond mewn datganiad diweddarach, cadarnhaodd y llu fod pedwar dyn wedi'u canfod gydag anafiadau trywanu.
Dywedodd y Prif Uwch-arolygydd Jason Stewart, sy'n gyfrifol am blismona yn yr ardal: "Fe wnaeth swyddogion ymateb o fewn munudau i'r digwyddiad ar ôl derbyn nifer o adroddiadau.
"Er bod yr ymchwiliad yn dal yn ei gamau cynnar, hoffwn dawelu meddwl y gymuned ein bod ar hyn o bryd yn credu mai digwyddiad unigol oedd hwn, sy'n ymwneud ag iechyd meddwl.
"Bydd swyddogion yr heddlu yn parhau yn yr ardal wrth i dystiolaeth gael ei chasglu o'r fan a'r lle.
"Rydym yn diolch i'r cyhoedd am eu dealltwriaeth."
Llun: PA
