Mae menyw 84 oed wedi marw yn dilyn gwrthdrawiad mewn pentref ger Abertawe.

Cafodd swyddogion Heddlu De Cymru eu galw i Ffordd Bishopston yn Llandeilo Ferwallt am tua 16.20 ddydd Iau yn dilyn adroddiadau o wrthdrawiad un cerbyd.

Bu farw menyw 84 oed o Landeilo Ferwallt, a oedd yn teithio yn y cerbyd, o ganlyniad i'w hanafiadau.

Fe wnaeth y gyrrwr, dyn 87 oed o Landeilo Ferwallt, ddioddef mân anafiadau.

Mae ymchwiliad i'r ddamwain yn parhau.

Cafodd y ffordd ei chau yn dilyn y digwyddiad, ond mae bellach wedi'i hail-agor.