Etholiadau Lleol 2022: Disgwyl canlyniadau ar draws Cymru

06/05/2022

Mae'r cyfri wedi dechrau yn etholiadau lleol Cymru ac mae canlyniadau rhai wardiau ar draws y wlad eisoes wedi eu cyhoeddi.

Wrth i sefyllfa'r cynghorau ddod i'r amlwg ar draws y wlad, isod bydd modd dilyn y canlyniadau'n llawn ar draws yr awdurdodau lleol drwy gydol y dydd.

Gyda 22 o gynghorau sir yng Nghymru, fe fydd 1,234 cynghorydd yn cael eu hethol o'r holl ymgeiswyr.

Ond beth fydd hyn yn ei olygu i sefyllfa'r pleidiau yn y wlad, a fydd Llafur yn parhau i adeiladu ar ei buddugoliaeth yn etholiadau'r Senedd 2021?

A fydd pleidlais y Ceidwadwyr yn cael ei heffeithio gan gyhuddiadau o bartïon yn Downing Street yn ystod y cyfnod clo?

A beth mae hyn i gyd yn ei olygu i Blaid Cymru dair blynedd wedi i Adam Price gymryd yr awenau fel arweinydd y blaid?

Yn ogystal â thynged y prif bleidiau, mae etholiadau lleol ychydig yn wahanol gan fod disgwyl y bydd nifer o aelodau annibynnol yn cael eu hethol.

Mae'r cyfri'n parhau mewn canolfannau ar draws y wlad. Llun: Castell-nedd Port Talbot

Canlyniadau

Blaenau Gwent - Llafur yn Cipio

Mae Llafur wedi cipio Blaenau Gwent oddi wrth yr Annibynwyr, mae'r blaid wedi sicrhau 21 o seddi o gymharu â 13 yn 2017.

Gwynedd - Plaid Cymru yn Cadw

Mae Plaid Cymru wedi dal ei gafael ar Gyngor Sir Gwynedd, gan gynyddu’r nifer o aelodau oedd ganddyn nhw ar y cyngor o 41 yn 2017 i 44 yn dilyn yr etholiadau ddydd Iau.