Mae llywydd Serbia wedi cyhuddo Awstralia o "gamdriniaeth" o'r seren tenis Novak Djokovic, am nad oedd wedi cael mynediad i'r wlad ar ôl iddo hedfan i Melbourne i gystadlu.

Roedd Djokovic wedi cael eithriad meddygol o reolau brechu coronafeirws ac i gael mynediad i Awstralia i gystadlu ym Mhencampwriaeth Tenis Agored y wlad.

Ond cafodd ei atal ym maes awyr Melbourne gan awdurdodau’r wlad am sawl awr cyn i'w fisa gael ei ganslo. 

Dywedodd Llu Ffiniau Awstralia ei fod wedi methu â darparu tystiolaeth ddigonol i gefnogi ei eithriad, ac mae'r chwaraewr bellach wedi mynd â'i achos i'r llys.

Dywedodd llywydd Serbia Aleksandar Vučić fod y wlad wedi cynnig cefnogaeth i'r Rhif 1 yn y byd.

Meddai mewn datganiad: "Dywedais wrth ein Novak fod Serbia gyfan gydag ef a'n bod yn gwneud popeth i weld bod aflonyddu chwaraewr tenis gorau'r byd yn dod i ben ar unwaith."

Mwy am y stori yma.