Cyfyngiadau teithio newydd yn sgil pryder am amrywiolyn Covid-19 yn Ne Affrica
Mae llywodraethau Cymru a Prydain wedi cyhoeddi cyfyngiadau teithio o'r newydd ar gyfer chwe gwlad ar gyfandir Affrica yn sgil pryderon am amrywiolyn newydd o Covid-19.
Er nad oes unrhyw achosion wedi eu hadnabod yn y DU hyd yma, mae Asiantaeth Diogelwch Iechyd y Deyrnas Unedig yn ymchwilio i'r amrywiolyn newydd.
Mae un arbenigwr o'r Asiantaeth wedi dweud: "Dyma'r amrywiolyn gwaethaf i ni weld hyd yma".
Fe fydd Botswana, De Affrica, Eswatini, Lesotho, Namibia a Zimbabwe yn cael eu hychwanegu i'r rhestr goch ar gyfer teithio rhyngwladol o 12:00 brynhawn dydd Gwener.
Dywedodd Ysgrifennydd Iechyd Lloegr Sajid Javid nos Iau fod angen "mwy o ddata" ond bod Llywodraeth y DU yn "cymryd camau gofalus nawr".
COVID-19 UPDATE:@UKHSA is investigating a new variant. More data is needed but we're taking precautions now.
— Sajid Javid (@sajidjavid) November 25, 2021
From noon tomorrow six African countries will be added to the red list, flights will be temporarily banned, and UK travellers must quarantine.
Fe fydd hediadau yn cael eu hatal dros dro o ddydd Gwener tra fod system gwarantin wedi ei sefydlu.
O 04:00 fore Sul bydd yn rhaid i deithwyr sy'n dychwelyd i'r DU dalu am le mewn gwesty cwarantin sydd wedi ei gymeradwyo gan y llywodraeth a threulio 10 diwrnod yno.
Mae'r llywodraeth hefyd yn gofyn i bobl sydd wedi dychwelyd o'r gwledydd penodol yn ystod y 10 diwrnod diwethaf i hunan-ynysu adref a chymryd prawf PCR ar yr ail a'r wythfed diwrnod ar ôl dychwelyd.