Teyrnged i 'dad ffyddlon' fu farw mewn gwrthdrawiad yn Sir Gaerfyrddin

NS4C 26/10/2021

Mae teulu dyn fu farw mewn gwrthdrawiad yn Sir Gaerfyrddin wedi rhoi teyrnged iddo.

Bu farw Ieuan Evans, 60, yn dilyn gwrthdrawiad rhwng dau gerbyd am tua 13:05, ddydd Sul 17 Hydref.

Bu farw yn y fan a'r lle wedi'r gwrthdrawiad ar ffordd y B4310 Drefach i Borthyrhyd.

Dywed ei deulu y byddant yn "gweld ei eisiau yn fawr" a'i fod yn "ŵr annwyl" a "thad ffyddlon".

Roedd Mr Evans yn yrrwr tacsi "adnabyddus" yn ardal Rhydaman tan iddo ymddeol yn ddiweddar.

Roedd hefyd yn feiciwr modur brwd ac roedd ganddo nifer o ffrindiau yn y gymuned beicwyr modur, yn ôl ei deulu.

Mae ei deulu'n derbyn cefnogaeth gan swyddogion arbenigol.

Roedd Mr Evans yn gyrru beic modur Yamaha yn y gwrthdrawiad â Ford Kuga arian ddydd Sul.

Mae'r heddlu yn apelio am unrhyw wybodaeth a fedrai fod o gymorth i'r ymchwiliad, gan ddefnyddio cyfeirnod DP-20211017-159.