Mae aelodau o Glwb Rhwyfo Madog wedi cwblhau her rwyfo 26 cilometr ar hyd afon Seine ym Mharis i nodi 25 mlynedd ers sefydlu’r clwb.

Fe wnaeth 15 aelod deithio i brifddinas Ffrainc i gymryd rhan yn y Traversée de Paris ddydd Sul, gyda 12 ohonyn nhw’n rhwyfo a thri yn gweithredu fel cox.

Fe wnaethon nhw ddefnyddio yolettes (cychau rhwyfo) sydd wedi’u llogi gan glwb lleol sy’n cynnal y digwyddiad.

Roedd disgwyl i dros 1,300 o rwyfwyr mewn mwy na 260 o gychod gymryd rhan eleni, gyda chynrychiolwyr o fwy na 10 o wledydd.

Yn ôl y trefnwyr, dyma’r unig adeg o’r flwyddyn y mae rhwyfo drwy ganol Paris ar afon Seine yn cael ei ganiatáu.

Image

Roedd y llwybr 26 cilometr yn mynd o dan 33 o bontydd ac yn mynd heibio rhai o dirnodau mwyaf adnabyddus y ddinas, gan gynnwys Tŵr Eiffel ac eglwys gadeiriol Notre-Dame.

Roedd angen i’r criw gyrraedd un o’r pontydd ar y daith o fewn amser penodol cyn i draffig arferol ddychwelyd i’r afon.

Dywedodd Lynda Roberts, aelod o Glwb Rhwyfo Madog, fod y daith yn gyfle i wneud rhywbeth newydd i nodi’r garreg filltir.

“Efo’r dathlu’r pum mlynedd ar hugain rydyn ni’n mynd i wneud rhywbeth newydd i’r clwb,” meddai.

“Rwy’n edrych ymlaen yn arw i gael cyfle i wneud y rhwyfo.

“Mae mynd allan ar y dŵr yn syml yn iachusol.”

O saith aelod i 80

Cafodd y clwb ei sefydlu 25 mlynedd yn ôl gan grŵp bychan o ddynion a busnesau lleol.

Saith aelod oedd yn rhan o’r clwb ar y dechrau, ac fe wnaethon nhw brynu eu Celtic Longboat cyntaf rhyngddyn nhw.

Yn ôl Lynda Roberts, mae gan y math yma o gwch hanes hir, gyda chriwiau yn eu defnyddio yn y gorffennol i fynd allan i gyfarfod llongau mwy cyn eu harwain yn ôl i’r harbwr.

Image

Byddai’r criw cyntaf i gyrraedd y llong yn cael ei dalu am y gwaith, gan arwain at rasio rhwng y cychod.

“Dyna pam mae ’na hanes hir o rasio’r llongau ’ma, y cychod ’ma,” meddai.

Erbyn hyn mae gan y clwb tua 80 o aelodau, gyda’r aelodau’n amrywio o 16 i 82 oed.

“Mae cyrraedd 25 mlynedd o hanes y clwb yn garreg filltir fawr, oherwydd mae’r clwb wedi tyfu rŵan o’r saith aelod gwreiddiol i fod yn 80 o aelodau sydd yn cymryd rhan yn y rhwyfo,” meddai Lynda.

“Mae bod yn rhan o’r clwb yn arbennig oherwydd bod o’n gymuned glos.

“Mae’r aelodau i gyd yn reit agos ac yn ffrindiau mawr yn edrych allan amdan ei gilydd.”

Mae aelodau’r clwb wedi cymryd rhan mewn sawl her rwyfo dros y blynyddoedd, gan gynnwys y Great River Race ar afon Tafwys yn Llundain a Monster the Loch ar Loch Ness yn yr Alban.

Image

Maen nhw hefyd wedi cymryd rhan mewn digwyddiadau fel Ocean to City yng Nghorc a’r Celtic Challenge rhwng Iwerddon a Chymru.

Mae’r aelodau’n hyfforddi drwy gydol y flwyddyn ac yn cymryd rhan mewn rasys hir a byr yn ystod y tymor.

Bydd Traversée de Paris yn cael ei chynnal ddydd Sul 13 Medi.

Lluniau: Clwb Rhwyfo Madog