Mae timau safonau masnach yng Nghymru wedi meddiannu miliwn o sigaréts anghyfreithlon ers dechrau’r flwyddyn gan rwystro cannoedd ar filoedd o bunnoedd rhag cyrraedd gangiau troseddol. 

Yn ôl swyddogion mae rhwystro gwerthiant baco anghyfreithlon yn allweddol wrth atal plant rhag ysmygu. 

 "Mae plant yn gallu cerdded i mewn i siop, deud y gair iawn, prynu nhw, a does 'na neb yn edrych ar eu hoedran nhw, does 'na neb yn meddwl gallai hyn roi ryw fath o ddiffyg i'w iechyd nhw," Alison Farrar o Safonau Masnach Cymru wrth raglen Newyddion S4C.

 Mae 8% o blant 15 ac 16 oed yn ysmygu - dyw’r ffigwr ddim wedi gostwng ers wyth mlynedd. 

 "Mae tua 6,000 o blant yn trio ac yn cychwyn ysmygu bob blwyddyn yng Nghrymu, ag yn anffodus bydd tri allan o bedwar o rheini yn cario mlaen ysmygu twy eu bywydau i gyd."

 Mae swyddogion wedi cynnal cyrchoedd mewn deuddeg ardal hyd yn hyn ac mae rhagor ar y gweill. 

 Maen nhw’n apelio ar unrhywun sydd â gwybodaeth am werthu baco anghyfreithlon i gysylltu â nhw.

 "Os fyswch chi yn digwydd mynd i mewn i siop ac yn clywed rhywun, neu yn digwydd sylwi bo rhywun yn prynu tybaco neu sigaréts sy'n rhatach, bo 'na ryw fath o guddiad neu rywbeth ein neges ni fysa i reportio fo. 

 "Os 'da chi ddim yn teimlo bydda chi'n hapus i roi eich manylion mi fedrwch chi reportio hyn yn ddienw trwy 'Crime Stoppers' ac mae'r wybodaeth yma yn dal yn mynd i gyrraedd safonau masnach, a 'da ni'n dal yn mynd i fedru neud rhywbeth am danna fo."