Arweinydd newydd y Democratiaid Rhyddfrydol yng Nghymru yn cymryd yr awenau
Bydd unig Aelod Seneddol y Democratiaid Rhyddfrydol yng Nghymru yn cymryd yr awenau fel arweinydd y blaid yng Nghymru ddydd Llun.
Bydd Aelod Seneddol Brycheiniog, Maesyfed a Chwm Tawe, David Chadwick, yn amlinellu ei weledigaeth mewn araith yng Nghaerdydd.
Daw hyn ar ôl i Jane Dodds, sy'n aelod o Sendd Cymru gyhoeddi y byddai'n ildio'r awenau ar ôl bron i naw mlynedd yn y rôl.
Mae Mr Chadwick yn 35 oed ac fe gafodd ei ethol i Senedd San Steffan yn 2024.
Fe yw llefarydd y Democratiaid Rhyddfrydol ar Gymru yn San Steffan.
Mae’n wynebu talcen caled ar ôl i’w blaid fethu ag ennill mwy nag un sedd yng Nghymru yn etholiadau diwethaf Senedd Cymru a Senedd San Steffan.
Wrth gyhoeddi ddiwedd mis Hydref ei fod am gymryd yr awenau, dywedodd fod Cymru yn “wlad sydd â photensial aruthrol”.
“Mae gennym bobl ifanc dalentog, busnesau arloesol a chymunedau sydd â’r uchelgais i gyflawni pethau mawr,” meddai.
“Ond yn rhy aml, nid yw’r cyfleoedd sydd ar gael i bobl yn cyfateb i’r uchelgais hwnnw.
“Rwyf am weld Cymru lle mae gwaith caled yn cael ei wobrwyo, lle mae gan fusnesau’r hyder i fuddsoddi a thyfu, a lle gall pobl ifanc adeiladu bywydau llwyddiannus heb deimlo bod yn rhaid iddyn nhw adael Cymru i lwyddo.”
