Mae archwiliad post-mortem wedi cadarnhau mai merch fach oedd babi y cafwyd hyd i’w chorff ar lan y Fenai ddydd Sul.

Mae Heddlu Gogledd Cymru yn dweud bod yr arwyddion cychwynnol yn awgrymu y gallai corff y babi fod wedi bod yn y dŵr ers rhai wythnosau.

Mae’r heddlu’n cadw meddwl agored ynglŷn â ble aeth y babi i’r dŵr, ac mae arbenigwyr ar y llanw ac eigioneg yn helpu swyddogion i geisio deall sut y daeth y corff i’r ardal lle cafodd ei ddarganfod.

Mae profion pellach hefyd yn cael eu cynnal, gan gynnwys profion i geisio canfod ethnigrwydd y babi.

Cafodd swyddogion eu galw ar ôl i aelod o’r cyhoedd ddod o hyd i’r corff ger Ffordd Siliwen ym Mangor, ar lan y Fenai, ychydig cyn 17:00 ddydd Sul, 27 Medi.

Mae ymholiadau o dŷ i dŷ yn cael eu cynnal yn yr ardal ac mae swyddogion hefyd yn edrych ar luniau CCTV.

Apêl eto i fam y babi

Dywedodd yr Uwcharolygydd Llinos Davies: “Yn dilyn darganfyddiad trasig o gorff babi ym Mangor ar ddydd Sul, y 27ain o Fedi, mae post mortem bellach wedi’i gwblhau.

“Rydym nawr yn gwybod mai merch oedd y babi bach.

“Rydym yn deall y gall y fam fod yn ofnus o ddod ymlaen ond rydym yn ei hannog i gysylltu â ni. Hoffwn roi sicrwydd iddi mai ei lles a’i diogelwch yw ein pryder pennaf.

“Dylai unrhyw un sydd â phryderon am ferch neu fenyw rydych chi’n meddwl y gallai fod wedi bod yn feichiog neu y mae ei hymddygiad wedi bod yn anarferol neu allan o gymeriad yn ystod y misoedd diwethaf, gan gynnwys tynnu’n ôl o ffrindiau, teulu neu gysylltiadau cymdeithasol, gysylltu â ni.

“Plis gwnewch y peth iawn i sicrhau bod y fam hon yn cael y cymorth iechyd sydd ei angen arni."

Bydd pob enw y maen nhw'n ei dderbyn yn cael ei drin "hefo’r disgresiwn mwyaf," medden nhw.

Ni wnaeth yr heddlu gynnig y cyfle i newyddiadurwyr eu holi ar gamera ddydd Iau.

'Diogel'

Dywedodd yr heddlu fod yr apêl gyntaf ganddyn nhw a’r gwasanaeth iechyd wedi cael ymateb cadarnhaol, gyda nifer o bobl yn cysylltu â gwybodaeth berthnasol.

Roedd rhai wedi cysylltu gan gredu eu bod yn gwybod pwy oedd y fam, ond nid yw hi wedi cael ei hadnabod hyd yma.

Dywedodd Fiona Giraud, Cyfarwyddwr Bydwreigiaeth a Gwasanaethau Merched Bwrdd Iechyd Prifysgol Betsi Cadwaladr, mai’r fam yw ei blaenoriaeth o hyd.

Wrth siarad yn uniongyrchol â hi, dywedodd: “Ein prif bryder o hyd yw eich iechyd, diogelwch a lles.

“Efallai eich bod yn teimlo nad oes gennych unrhyw le i droi, neu na allwch siarad ag unrhyw un am yr hyn sydd wedi digwydd. Peidiwch â theimlo bod yn rhaid i chi wynebu hyn ar eich pen eich hun.

“Nid ydym eto yn gwybod yr holl amgylchiadau sy’n ymwneud â marwolaeth eich babi, ond yr hyn sy’n bwysig yw ein bod yn dod o hyd i chi, yn gwneud yn siŵr eich bod yn ddiogel, ac yn sicrhau eich bod yn cael unrhyw sylw meddygol a chymorth y gallai fod ei angen arnoch.

“Rwy’n gofyn i chi’n bersonol, plis cymerwch y cam cyntaf a chysylltwch â ni. Mae yna bobl i’ch helpu chi.”