Dyma'r cam cyntaf wrth i’r rhanbarth baratoi i groesawu’r Ŵyl i’r ddinas am y tro cyntaf.

 

Roedd y dathliadau’n cynnwys gorymdaith fywiog o Sgwâr John Frost tuag at Theatr Glanyrafon gyda jambori a pherfformiadau byw gan Martyn Geraint a Mei Gwynedd yn rhan o’r adloniant.

 

Roedd 55 o ysgolion Gwent yn rhan o'r Ŵyl Groeso, gyda'r digwyddiad yn rhan o ymdrechion gwirfoddolwyr lleol i annog mwy o bobl ifanc yr ardal i gystadlu yn Eisteddfod yr Urdd.

 

Dywedodd Llio Maddocks, Cyfarwyddwr Eisteddfod yr Urdd a’r Celfyddydau: “Roedd hi’n hynod braf gweld cymaint o blant a phobl ifanc yn cymryd rhan yn yr Ŵyl Groeso. Mae’n amlwg bod cyffro mawr o amgylch Eisteddfod Bro’r Wenynen yn barod.

 

“Mae croeso mawr i bawb yn Eisteddfod yr Urdd, ac mae cynnal ein prifwyl yng Nghasnewydd yn gyfle gwych i ddod â’n diwylliant at sylw cynulleidfaoedd newydd.

 

“Diolch i bawb ddaeth i gefnogi ac i wirfoddoli heddiw, ac i'r Pwyllgor Gwaith am drefnu'r diwrnod. Edrychwn ymlaen yn fawr at Eisteddfod yr Urdd Bro'r Wenynen, a chofiwch gysylltu os hoffech wirfoddoli neu gefnogi ar hyd y daith.”

 

Ychwanegodd Efa Maher, Cadeirydd Ifanc y Pwyllgor Gwaith: “Mae’n destun balchder i ni ar y Pwyllgor Gwaith i weld cymaint o ieuenctid ein hardal yn cymryd rhan yng ngweithgareddau Eisteddfod yr Urdd Bro’r Wenynen.

 

"Mae’r Urdd yn cynnig profiadau anhygoel i blant a phobl ifanc drwy’r Gymraeg, a dwi’n un sydd wedi elwa cymaint o’r mudiad fy hun. Mae mor bwysig bod Eisteddfod yr Urdd yn dod i ardaloedd fel Casnewydd, i ni gael dangos yr holl gyfleoedd sydd ar gael drwy’r Gymraeg ar ein stepen drws.”

 

Bydd yr ŵyl yn cael ei chynnal yn Nhŷ Tredegar, Casnewydd rhwng dydd Sadwrn, 29 Mai a dydd Gwener, 4 o Fehefin 2027.