Mae Andy Burnham wedi cyhoeddi y bydd Llywodraeth y DU yn sefydlu canolfan er mwyn "atal y llif gwenwynig" o gamwybodaeth, gan gynnwys o Rwsia.

Ychwanegodd ei fod eisiau i Brydain arwain ymdrechion i sefydlu safonau diogelwch byd-eang ar gyfer deallusrwydd artiffisial.

Rhybuddiodd fod asiantaethau Rwsia yn defnyddio "pob dull sydd ar gael iddyn nhw", gan gynnwys gwefannau ffug, i "ledaenu celwyddau a chamwybodaeth".

Fe wnaeth y Prif Weinidog y sylwadau yn ystod ei araith ryngwladol fawr gyntaf yng Nghynulliad Cyffredinol y Cenhedloedd Unedig yn Efrog Newydd.

Bydd y ganolfan newydd, meddai, yn canfod ac yn atal ymgyrchoedd camwybodaeth gan wladwriaethau sy'n defnyddio AI.

Bydd y ganolfan yn gweithio gydag asiantaethau cudd-wybodaeth, adrannau'r llywodraeth, asiantaethau gorfodi'r gyfraith a chwmnïau cyfryngau cymdeithasol.

'Lledaenu celwyddau'

“Mae asiantaethau Rwsia wedi defnyddio pob dull sydd ar gael iddyn nhw i ledaenu celwyddau a chamwybodaeth ac i fanteisio ar ofnau pobl,” meddai.

“Maen nhw wedi defnyddio botiau a gwefannau ffug, ac erthyglau papur newydd wedi’u ffugio. Maen nhw wedi ffugio brandiau 28 o sefydliadau Prydeinig – gan gynnwys prifysgolion a’r BBC. Maen nhw wedi chwyddo naratifau’r dde eithafol."

Fe soniodd am Etholiad Cyffredinol 2019 gan ddweud bod yna "dystiolaeth" bod Rwsia wedi ceisio ymyrryd bryd hynny.

“Rydyn ni hefyd yn gwybod eu bod wedi ceisio tanio tensiynau ac aflonyddwch yn dilyn digwyddiadau erchyll. Mae’r syniad y byddai unrhyw un yn ceisio defnyddio pethau o’r fath er mantais iddyn nhw eu hunain yn ffiaidd – ond dyna maen nhw’n ei wneud.”

Doedd dim ymateb yn syth gan Rwsia, er bod cynrychiolydd o'r wlad yn eistedd yn yr ystafell pan wnaeth Andy Burnham ei araith. Ond yn y gorffennol, mae Rwsia wedi wfftio honiadau o gamwybodaeth.

Yn ystod ei araith, dywedodd y Prif Weinidog hefyd fod AI yn "allweddol i dwf economaidd", ond y byddai hefyd yn "dwysáu risgiau".

Fe wnaeth o addo rhoi AI "wrth wraidd Llywyddiaeth y DU o'r G20 y flwyddyn nesaf", pan fydd arweinwyr economïau mwyaf y byd yn cwrdd ym Manceinion.

Dywedodd y byddai'r DU yn llunio cyfres o egwyddorion a safonau byd-eang er mwyn sicrhau tryloywder a bod y dechnoleg yn cael ei datblygu'n ddiogel.

Llun: Toby Melville/PA