Mae Kemi Badenoch wedi disodli aelod arall o gabinet ei gwrthblaid, gan symud Syr Mel Stride o'i swydd fel y Canghellor cysgodol a phenodi Andrew Griffith yn ei le.

Mae arweinydd y Ceidwadwyr yn ail-drefnu ei chabinet cysgodol cyn i'r Senedd ddychwelyd i San Steffan ddydd Mawrth, yn y cyfnod cyn cynhadledd y blaid ym mis Hydref.

Bydd Claire Coutinho, oedd gynt yn Ysgrifennydd Ynni'r Wrthblaid, yn cymryd lle Mr Griffith fel Ysgrifennydd Busnes yr Wrthblaid, tra bydd Syr Mel yn ymuno â ffigyrau amlwg y blaid, fel y Fonesig Priti Patel a Syr James Cleverly, ar y meinciau cefn yn sgil y newidiadau.

Cafodd Priti Patel ei disodli fel Ysgrifennydd Tramor yr Wrthblaid gan Tom Tugendhat ddydd Sul.

Cyhoeddodd Syr James ddydd Sadwrn y byddai'n camu i lawr fel Ysgrifennydd Tai yr Wrthblaid er mwyn ceisio ennill enwebiad y Ceidwadwyr ar gyfer swydd Maer Llundain.

'Cefndir ariannol trawiadol'

Dywedodd ffynhonnell yn y blaid Geidwadol fod Mr Griffith wedi'i benodi oherwydd ei "gefndir ariannol a busnes trawiadol dros ben", gan dynnu sylw at ei waith fel cadeirydd cwmni Just Eat.

Rhoddodd Mrs Badenoch deyrnged i waith Syr Mel fel Canghellor yr Wrthblaid, gan ddweud: “Fel Priti, daeth Mel i’r swydd ar adeg hynod anodd i’r Blaid Geidwadol.

“Daeth â phrofiad, difrifoldeb a sefydlogrwydd pan oedd eu hangen yn fawr. Helpodd ni i sefydlogi’r sefyllfa, ailadeiladu hygrededd economaidd a dod yn wrthblaid effeithiol, ac rwy’n wirioneddol ddiolchgar am ei gyfraniad.

“Ni fyddai’r Blaid Geidwadol wedi cyrraedd y man lle’r ydym heb ei waith a’r ffordd effeithiol iawn y bu’n herio Rachel Reeves... mae Mel wedi bod yn gefnogol iawn i’r tîm economaidd newydd ac i’r blaid, ac wedi bod yn hynod ffyddlon; byddaf bob amser yn ddiolchgar iddo am y gwaith y mae wedi’i wneud.”