Mae teulu o orllewin Cymru wedi dweud bod y fferm a’r cylch sioeau wedi rhoi “bach o normalrwydd” iddyn nhw ar ôl i’w mab gael diagnosis o diwmor ar yr ymennydd.

Mae Siân a Simon Davies yn rhedeg Fferm Brynhyfryd yn Efailwen, ar y ffin rhwng Sir Gâr a Sir Benfro, gyda’u meibion Isaac ac Elliott.

Mae’r teulu’n godro tua 250 o wartheg ac yn magu gwartheg Holstein pedigri o dan yr enw Castellhyfryd.

Maen nhw wedi bod yn paratoi nifer o’u gwartheg i’w harddangos yn Sioe Sir Benfro eleni.

Image

Dywedodd Simon fod y gwaith dyddiol ar y fferm wedi rhoi rhywbeth arall i’r teulu ganolbwyntio arno drwy gyfnod anodd.

“Trwy’r amser caled, mae’r gwartheg yn mynd ymlaen. Mae rhywbeth arall i ni feddwl hefyd, a jyst i helpu cadw ni’n mynd trwy bethau,” meddai.

Diagnosis annisgwyl

Fe ddechreuodd y teulu sylwi nad oedd Isaac yn teimlo fel arfer yn ystod Sioe Frenhinol Cymru yn 2024.

Roedd yn anarferol o flinedig ac, ar 1 Tachwedd y flwyddyn honno, fe gafodd ddiagnosis o diwmor ar yr ymennydd.

Roedd Isaac yn gapten ar dîm ieuenctid Clwb Rygbi Crymych ac yn ffermwr ifanc brwd.

Image

Roedd wedi chwarae rygbi ar y dydd Iau, ond erbyn oriau mân bore Gwener roedd yn yr adran damweiniau ac achosion brys.

Cafodd lawdriniaeth yn Ysbyty Athrofaol Cymru, Caerdydd cyn derbyn chwe wythnos o therapi pelydrau proton yn Llundain a phedwar mis o gemotherapi.

Dywedodd Siân fod ei mab yn parhau i weithio’n galed ar ei adferiad.

“Mae Isaac yn gweithio’n galed yn physio bron pob dydd rili. Mae e’n wella pob wythnos rili.

“So, bydd e’n neis ei weld e nôl yn arwain y da a pethau fel ’na yn y dyfodol.”

‘Bach o normalrwydd’

Pan oedd Siân a Simon yn treulio cyfnodau yn yr ysbyty gydag Isaac, fe ysgwyddodd Elliott fwy o gyfrifoldeb ar y fferm ochr yn ochr â’i arholiadau Safon Uwch.

Fe wnaeth staff, cymdogion a ffrindiau hefyd helpu gyda’r gwaith a’r shifftiau godro.

Image

Er gwaethaf yr hyn oedd yn digwydd, fe barhaodd Elliott i baratoi ac arddangos gwartheg mewn sioeau.

Mae enwau’r ddau frawd bellach ar yr un darian yn Hwlffordd, ar ôl i Isaac ennill yn 2023 ac Elliott yn 2025.

Un o uchafbwyntiau Isaac oedd ennill yn y Welsh Dairy Show, yn ogystal â chystadlu yn Sioe Frenhinol Cymru.

Dywedodd Siân fod dychwelyd i Sioe Sir Benfro a chymryd rhan yn y cylch sioeau wedi bod yn bwysig i’r teulu.

“Roedd e’n bwysig i ni, fi’n credu fel teulu, cadw mynd, trio bod yn bositif, bach o normalrwydd falle.

“Mae’n siawns i ni gwrdd lan â lot o bobl, a lot o bobl lleol rili. So, mae’n bwysig.”

Cefnogaeth y gymuned

Yn dilyn diagnosis Isaac, sefydlodd y teulu ymgyrch In It With Isaac i godi arian i’r elusennau a’r sefydliadau oedd wedi ei gefnogi drwy ei driniaeth.

Image

Cafodd mwy na £75,000 ei godi yn ystod diwrnod codi arian ym mis Awst 2025.

Roedd y digwyddiadau’n cynnwys gêm rygbi rhwng timau ieuenctid Crymych a Sir Benfro, gydag Nigel Owens yn dyfarnu, arwerthiant addewidion a thaith feicio o Garreg Waldo i Grymych.

Dywedodd y teulu eu bod am ddiolch i’r sefydliadau sydd wedi helpu Isaac, a sicrhau bod yr un gefnogaeth ar gael i bobl eraill yn y dyfodol.

Bydd rhaglen o uchafbwyntiau Sioe Sir Benfro am 21:00 nos Iau ar S4C, S4C a BBC iPlayer