Mae'r cyflwynydd teledu a'r naturiaethwr Steve Backshall wedi ei benodi'n Athro er Anrhydedd ym Mhrifysgol Bangor am ei gyfraniad eithriadol at y brifysgol a'i myfyrwyr.

Mae Steve Backshall yn fwyaf adnabyddus am y rhaglenni Deadly 60, Expedition a Blue Planet Live. 

Ymunodd â thîm dysgu Prifysgol Bangor yn 2020 ac ers hynny mae wedi bod yn ymwelydd rheolaidd â'r brifysgol.

Mae Mr Backshall wedi cynnal darlithoedd i gannoedd o fyfyrwyr ac aelodau'r cyhoedd ym Mangor ar bynciau gan gynnwys gwenwyn, siarcod a nadroedd yn ogystal â chadwraeth bywyd gwyllt a sut beth ydy gweithio yn y diwydiant rhaglenni natur.

Yn ystod ei gyfnod gyda Phrifysgol Bangor, mae wedi mynd â myfyrwyr i snorcelu oddi ar arfordir Ynys Môn ac i weld bywyd gwyllt ar hyd arfordir gogledd Cymru. 

Mae hefyd wedi cyhoeddi gwaith gwyddonol gydag academyddion Bangor ar ôl ffilmio rhaglen ddogfen yn Suriname ar y berthynas rhwng adar gwartheg enfawr a thapiriaid De America.

Cafodd hefyd radd er anrhydedd gan Brifysgol Bangor am ei wasanaeth i addysg yn 2023.

'Brwdfrydedd y myfyrwyr a'r staff'

Dywedodd Mr Backshall: "Mae Bangor yn lle arbennig iawn i mi.

"Mae gan y brifysgol arbenigedd yn y gwyddorau amgylcheddol a naturiol, ond yr hyn sy’n sefyll allan fwyaf i mi yw brwdfrydedd y myfyrwyr a’r staff."

Ychwanegodd: "Rwy’n falch dros ben o gael fy ngwneud yn Athro er Anrhydedd ym Mhrifysgol Bangor.

“Rwyf wrth fy modd fy mod wedi gallu treulio amser gyda myfyrwyr dros y blynyddoedd diwethaf, boed hynny mewn darlithfa, allan ar y dŵr neu’n siarad am fywyd gwyllt a chadwraeth. Rwy'n falch iawn o fod yn rhan o gymuned Bangor ac rwy'n edrych ymlaen at wneud hyd yn oed mwy o bethau gyda'n gilydd."

'Malio am ein myfyrwyr'

Dywedodd yr Athro Christian Dunn, Pennaeth yr Ysgol Gwyddorau Amgylcheddol a Naturiol: "Mae Steve yn amlwg yn un o’r cyflwynwyr natur mwyaf adnabyddus yn y wlad, ond yr hyn efallai na fydd pobl yn ei wybod yw pa mor hael y mae gyda’i amser a’i wybodaeth. Mae wir yn malio am ein myfyrwyr. 

"Mae'n dod i Fangor, yn rhoi darlithoedd, yn mynd â myfyrwyr allan i'r maes ac yn creu cyfleoedd iddynt na fyddent yn eu cael fel arfer.

"Mae ein myfyrwyr wedi tyfu i fyny yn gwylio Steve ac wedi cael eu hysbrydoli ganddo i astudio sŵoleg, cadwraeth a gwyddorau naturiol. Dros y blynyddoedd diweddar, mae wedi cwrdd â channoedd ohonyn nhw yma ym Mangor, ac wedi eu hysbrydoli i gyd."