Mae pedwar dyn wedi’u harestio ac mae dau ohonyn nhw mewn cyflwr difrifol yn yr ysbyty yn dilyn anhrefn treisgar yn ne Cymru.

Fe ddaeth yn dilyn digwyddiad yn ymwneud â grŵp o ddynion ym Mhontnewynydd, ger Pont-y-pŵl, tua 19:15 nos Iau, yn ôl Heddlu Gwent.

Mae dau o’r dynion gafodd eu harestio yn parhau yn nalfa’r heddlu ac mae dau ddyn yn parhau i fod yn yr ysbyty mewn cyflwr difrifol.

Roedd swyddogion arfog yn bresennol yn y lleoliad, ynghyd â Gwasanaeth Awyr Cenedlaethol yr Heddlu a pharafeddygon.

Dywedodd y Ditectif Brif Uwch-arolygydd Anne-Marie Salwey: “Mae trais o unrhyw fath yn gwbl annerbyniol a bydd unrhyw un y canfyddir eu bod wedi bod yn rhan o’r anhrefn hwn yn cael eu trin yn briodol, gan na fyddwn yn derbyn ymddygiad o’r fath yn ein cymunedau.

“Rydym yn cydnabod y bydd adroddiadau o’r natur yma yn peri pryder i drigolion, ac mae’n debygol y byddwch yn gweld swyddogion yn yr ardal  yn cynnal ymholiadau fel rhan o’r ymchwiliad.”

Mae’r heddlu’n apelio ar unrhyw un sydd â gwybodaeth am y digwyddiad, neu sydd â lluniau teledu cylch cyfyng neu gamera cerbyd o’r ardal o amgylch Ffordd yr Ysbyty a Ffordd y Felin, i gysylltu gyda nhw.