Pylu mae'r gobeithion o ddod o hyd i ragor o bobol yn fyw wedi i ddaeargrynfeydd nerthol daro Venezuela ganol yr wythnos.

Yn ôl swyddogion yno, dyma'r argyfwng gwaethaf yn y wlad ers 123 o flynyddoedd, gyda'r cofnodion diweddaraf yn amcangyfrif fod o leiaf 1,430 wedi marw a 3,238 wedi eu hanafu.   

Roedd y daeargrynfeydd a oedd yn mesur 7.2 a 7.5 ymhlith y mwyaf nerthol yn Venezuela ers mwy na chanrif, gyda'r dirgryniadau i'w teimlo ar hyd a lled y wlad. 

Gyda chynifer o gartrefi wedi eu dinistrio, y gred yw fod mwy na 3,000 o deuluoedd yn byw mewn llochesi dros dro. 

Mae criwiau achub a phobl leol yn dal i geisio dod o hyd i bobl yn fyw o dan y rwbel, gyda nifer ar lawr gwlad yn rhwystredig ac yn dadlau nad yw'r llywodraeth yno wedi ymateb yn ddigon cyflym.

Ymhlith y criwiau achub rhyngwladol sydd wedi eu hanfon i Venezuela, mae aelodau o ddau wasanaeth tân yng Nghymru.

Nos Wener, gadawodd tîm achub a chwilio canolfan y llu awyr yn Brize Norton, Sir Rydychen, ar ôl cais gan y Swyddfa Dramor. 

Ymhlith y tîm o 68 aelod, mae gweithwyr tân o Wasanaeth Tân ac Achub De Cymru a Gwasanaeth Tân ac Achub Canolbarth a Gorllewin Cymru. 

Hefyd ar y daith mae chwe chi a gweithwyr dyngarol. 

Dywedodd Cyngor y Penaethiaid Tân bod gan y diffoddwyr arbenigedd eithriadol.

"Byddan nhw'n gweithio ochr yn ochr â thimau lleol a rhyngwladol gan ddarparu cymorth yn y mannau y mae ei angen, gyda'r bwriad o achub bywydau mewn amodau hynod o heriol," meddai'r cadeirydd Phil Garrigan. 

"Mae'r nod yn glir, ac rwy'n gwybod y byddan nhw'n ymateb gyda gofal a thosturi."

Cyhoeddodd Llywodraeth San Steffan y bydd yn darparu £2 filiwn i'r wlad er mwyn i'r awdurdodau ymateb i'r argyfwng. 

Yng nghanol y tor calon yn Venezuela , mae ambell eiliad ryfeddol, gyda baban newydd anedig yn cael ei dynnu o'r rwbel ddydd Sadwrn.

Ond yr ofnau ydy fod degau ar filoedd o bobl yn dal ar goll.