Mae dyn 19 oed wedi cyfaddef iddo ysgarthu (defecate) mewn pwll nofio yn fwriadol ar sawl achlysur yng Nghastellnewydd Emlyn, Sir Gaerfyrddin.

Bu'n rhaid i Bwll Nofio Castellnewydd Emlyn gau sawl gwaith rhwng mis Tachwedd 2025 a mis Mai 2026 ar ôl i "wastraff" gael ei ddarganfod yn y pwll ar sawl achlysur.

Roedd Heddlu Dyfed-Powys wedi derbyn adroddiad am gyfres o ddigwyddiadau, medden nhw.

Mewn datganiad, dywedodd yr heddlu fod dyn 19 oed o Geredigion wedi cyfaddef iddo ysgarthu yn y pwll ar sawl achlysur.

"Roedd Heddlu Dyfed-Powys wedi derbyn adroddiad am ddigwyddiadau o ddifrod troseddol honedig yng Nghanolfan Hamdden Castellnewydd Emlyn," meddai'r llu.

"Roedd y digwyddiadau rhwng Tachwedd 2025 a Mai 2026 ac yn cynnwys gwastraff yn cael ei osod yn fwriadol yn y pwll nofio, gan arwain at y pwll yn cau a’r angen i’w lanhau.

"Cafodd dyn 19 oed o ardal Aberteifi ei adnabod a’i gyfweld gan swyddogion. 

"Fe wnaeth gyfaddef yn llawn i’r troseddau, ac fe gafodd y mater ei ddatrys drwy Ddatrysiad Cymunedol i Oedolion. Mae’r ymchwiliad bellach wedi dod i ben."

Mae Pwll Nofio Castellnewydd Emlyn yn cael ei redeg gan elusen yn y gymuned, sydd ar wahân i'r Ganolfan Hamdden sydd dan ofal Cyngor Sir Gaerfyrddin.