Mae dau degan oedd yn caniatáu i blant chwarae gyda thywod wedi eu tynnu oddi ar y silffoedd am eu bod yn cynnwys asbestos.

Roedd y teganau ar werth ar draws y DU. 

Fe wnaeth profion gan Which? ar nifer o gynhyrchion - llawer ohonyn nhw’n deganau i blant - ddod o hyd i’r cynnwys gwenwynig.

Roedd un o’r ddau degan i gael ei alw’n ôl yn hambwrdd creu celf mewn tywod ac ar werth ar Amazon Marketplace a TikTok Shop.

Fe ddangosodd profion Which? fod y tywod yn y pecyn yn cynnwys y sylwedd gwaharddedig asbestos tremolit.

Mae’n gallu achosi clefydau difrifol ar yr ysgyfaint os caiff ei anadlu i mewn, hyd yn oed ar lefelau isel.

Mae cynhyrchion sy’n cynnwys unrhyw faint o asbestos wedi’u gwahardd rhag cael eu gwerthu yn y DU.

Dywedodd Which? fod y set wedi parhau i fod ar werth ar Amazon a TikTok tan fis Mai, er bod yr un cynnyrch wedi cael ei alw’n ôl gan y Swyddfa Diogelwch a Safonau Cynnyrch (OPSS) ym mis Mawrth oherwydd llygredd asbestos.

Mae’r OPSS bellach wedi diweddaru’r hysbysiad gwreiddiol i alw’r cynnyrch yn ôl er mwyn cynnwys Amazon a TikTok Shop.

Image

Daeth ymchwilwyr Which? o hyd i asbestos tremolit mewn set arall creu calon a seren allan o dywod oedd yn cael ei werthu yn Asda.

Roedd hefyd ar werth ar wefan eBay gan werthwyr preifat.

Mae mwy na 39 o hysbysiadau galw cynnyrch yn ôl wedi cael eu cyhoeddi gan yr OPSS ers mis Tachwedd mewn cysylltiad â chynhyrchion tywod sydd wedi’u llygru ag asbestos.

Y gred yw bod y teganau yr effeithiwyd arnyn nhw yn cynnwys tywod o chwareli penodol yn Tsieina, lle mae asbestos yn bresennol yn naturiol.

Dywedodd Sue Davies, pennaeth polisi hawliau defnyddwyr Which?: “Mae’n warthus bod marchnadoedd ar-lein yn gwerthu cynhyrchion a allai olygu gallai plant ddod i gysylltiad ag asbestos, yn enwedig pan oedd rhai o’r cynhyrchion hyn eisoes wedi cael eu galw’n ôl gan yr OPSS.

“Gall eitemau sy’n ymddangos yn ddiniwed, fel teganau a phecynnau crefft, gael effeithiau iechyd difrifol os nad oes gwiriadau priodol i wneud yn siŵr eu bod yn cydymffurfio â chyfreithiau diogelwch.”

Ymateb

Dywedodd llefarydd ar ran Amazon: “Diogelwch cwsmeriaid yw ein prif flaenoriaeth, ac rydym yn cymryd y mater hwn o ddifrif.

“Rydym yn y broses o dynnu pob cynnyrch yn y categori hwn oddi ar ein siop wrth i ni ymchwilio ymhellach. O achos hyn mae’r eitemau dan sylw wedi cael eu tynnu i lawr.”

Dywedodd Asda eu bod wedi dechrau galw’r cynnyrch yn ôl cyn gynted ag y cawsant wybod bod y cynnyrch wedi methu profion.

Fe wnaethon nhw gynghori cwsmeriaid oedd wedi prynu’r cynnyrch i roi’r gorau i’w ddefnyddio ar unwaith a’i ddychwelyd i’w siop agosaf i gael ad-daliad llawn.

Dywedodd llefarydd ar ran eBay: “Fe wnaethom ni dynnu’r eitemau a nodwyd gan Which? oddi ar y wefan yn gyflym, ac rydym yn cynnal rhagor o chwiliadau i ddod o hyd i ddeunydd tebyg sydd ar werth.”

Dywedodd TikTok fod y cynnyrch a nodwyd yn ystod yr ymchwiliad eisoes wedi cael ei dynnu oddi ar TikTok Shop.