Mae arweinydd dros dro newydd Llafur Cymru wedi dweud ei bod bellach yn amlwg nad yw clymblaid gyda Phlaid Cymru yn y Senedd yn bosib.

Dywedodd Ken Skates, a gafodd ei benodi yn arweinydd dros dro ei blaid ddydd Sadwrn, ei fod “y tu hwnt i ystyriaeth” [out of the question] y byddai yna gytundeb clymbleidio ffurfiol.

Fe awgrymodd hefyd na fyddai ei blaid yn awyddus i gydweithio â’r Ceidwadwyr a Reform er mwyn gwrthwynebu ffurfio llywodraeth Plaid Cymru.

“Mae’r syniad o bartneriaethu gyda Reform yn un hynod annymunol i bob aelod o’r grŵp,” meddai. “Ond fe wnawn ni benderfyniad terfynol yfory.”

Wrth gyfeirio at Rhun ap Iorwerth, arweinydd Plaid Cymru, dywedodd: “Rwy’n credu bod Rhun ei hun wedi dweud eu bod nhw am lywodraethu fel llywodraeth leiafrifol.

“Rwy’n awyddus i ganolbwyntio ar sicrhau y gallwn ni gael y canlyniadau gorau posib i’r bobl rydyn ni’n eu gwasanaethu.

“Mae clymblaid, yn ôl Rhun, y tu hwnt i ystyriaeth. Rydw i’n croesawu'r cyfle i arwain tîm a fydd yn gwrthwynebu'r llywodraeth pan fo angen, ac yn ei dal i gyfrif.

“Ac fel y dywedais i, canolbwyntio ar wella bywydau pobl, nid chwarae gemau a nonsens.”

Wrth siarad ar Politics Wales ddydd Sul dywedodd Rhun ap Iorwerth nad oedd yn ystyried clymblaid ond yn hytrach cydweithio ar bob pleidlais.

"Rydw i wedi ei wneud yn glir mai dyna'r ffordd ydw i'n credu mae angen symud ymlaen," meddai.

"Y cydweithio sy'n bwysig."

'Anodd'

Dywedodd Ken Skates fod canlyniad yr etholiad, a welodd nifer ASau ei blaid yn gostwng o 29 mewn Senedd o 60 aelod i naw mewn Senedd o 96, yn “drychinebus”.

“Mae fy nghalon gyda’r holl bobl hynny a weithiodd mor galed drosom ni — ein haelodau, y bobl a bleidleisiodd drosom ni,” meddai.

“Mae'n ddrwg iawn gen i ein bod ni wedi dioddef y golled hon, ac yn arbennig mae'n ddrwg gen i dros Eluned Morgan, sydd wedi bod yn arweinydd rhyfeddol mewn cyfnodau anodd.”

Cafodd Skates ei ethol am y tro cyntaf yn 2011, ac mae wedi dal sawl swydd yn Llywodraeth Cymru, gan gynnwys Ysgrifennydd Trafnidiaeth ac Ysgrifennydd yr Economi a’r Seilwaith.

Bydd yn gwasanaethu fel arweinydd nes y bydd amserlen wedi’i gosod ar gyfer etholiad arweinyddiaeth llawn yn unol â rheolau Llafur Cymru.