Bydd disgwyl i Sophie Ingle ennill ei 150fed cap dros Gymru yn erbyn Albania nos Sadwrn.

Fe wnaeth rheolwr Cymru, Rhian Wilkinson gadarnhau ddydd Gwener y bydd Ingle yn chwarae ei 150fed gêm dros ei gwlad - yr ail chwaraewr yn unig i gyflawni hynny ar ôl Jess Fishlock.

Wrth siarad cyn y gêm dywedodd Ingle mai anrhydedd mwyaf ei gyrfa oedd gwisgo crys Cymru.

"Dwi'n gyffrous, mae'n gêm arall i mi ond yn un dwi mor falch ohoni," meddai.

"Chwarae dros Gymru yw'r peth gorau dwi wedi a siŵr o fod mynd i wneud yn ystod fy ngyrfa.

"Wrth gwrs mae ennill teitlau a thlysau ar lefel clwb yn wych, ond does dim teimlad gwell na wisgo crys Cymru a chwarae gyda'r grŵp yma o ferched dros y 15 mlynedd diwethaf."

Wrth glywed awgrym cyn-ymosodwr Cymru, Helen Ward y gallai Ingle ennill 200 cap dros ei wlad, roedd chwaraewr canol cae Cymru wedi chwerthin cyn ychwanegu, "fyddai'n 40 erbyn hynny."

Image

Enillodd Cymru o 4-0 yn erbyn Albania ar y Stok Cae Ras yn Wrecsam nos Fawrth.

Maen nhw yn ail yn eu grŵp rhagbrofol tu ôl i Tsiecia, er bod y ddwy wlad ar yr un nifer o bwyntiau a gwahaniaeth goliau.

Mared Griffiths o Drawsfynydd oedd seren y gêm nos Fawrth, wrth iddi greu dau o goliau Cymru yn yr ornest.

Roedd Hannah Cain wedi sgorio dwy hefyd, gan olygu ei bod wedi sgorio chwech o goliau mewn pedwar ymddangosiad yn yr ymgyrch hon.

Er i Gymru sgorio pedwar o goliau yn erbyn Albania, mae Sophie Ingle yn dweud bod angen i'r garfan gwneud y mwyaf o'u cyfleoedd o flaen y gôl.

"Roeddem yn dominyddu'r bel ac roedd y chwarae yng nghanol cae a'r ymosod yn dda iawn," meddai.

"Ond fel roedd Rhian wedi cyffwrdd arni, mae angen i ni fod yn well o flaen gol achos yn erbyn timoedd gwell bydd llai o gyfleoedd i sgorio.

"Os ydyn ni'n gallu sgorio'r cyfleoedd hynny ac adeiladu hyder oddi ar hynny, byddwn mewn lle da pan yn chwarae yn erbyn timoedd gwell."

Bydd y gic gyntaf rhwng Albania a Chymru am 17.00 nos Sadwrn, gydag uchafbwyntiau estynedig ar S4C am 22.00.