Bocsio: Lauren Price yn gobeithio amddiffyn ei theitlau byd yng Nghaerdydd
04/04/2026
Bydd Lauren Price yn gobeithio amddiffyn ei theitlau byd nos Sadwrn yn erbyn Stephanie Pineiro yng Nghaerdydd.
Fe fydd Price yn amddiffyn gwregys pwysau welter y WBC, WBA ac IBF, gyda'r fantais gartref yn hwb mawr iddi.
Nid yw Price wedi bocsio ers ychwanegu'r beltiau WBC ac IBF i'w theitl WBA yn y fuddugoliaeth sylweddol yn erbyn Natasha Jonas yn Llundain ym mis Mawrth y llynedd.
Dywedodd Price "nad oes unrhyw deimlad fel yr un wrth gerdded allan i dorf o Gymru.
"Mae 4 Ebrill yn fwy na dim ond ceisio cadw fy nheitlau, dwi eisiau cadarnhau fy ngwaddol. Mae Stephanie yn wrthwynebydd o safon fyd-eang, ond dwi wedi profi dro ar ôl tro fy mod i ar y brig i aros.
"Mae'r teitlau yn aros yng Nghymru."
Enillodd Price, 31, fedal aur Olympaidd yn Tokyo 2020, sef y bocsiwr cyntaf o Gymru i wneud hynny, cyn troi yn broffesiynol yn 2022.
Nid yw Stephanie Pineiro wedi colli mewn 10 gornest broffesiynol, ond nid yw hi erioed wedi ymladd y tu allan i Puerto Rico.
"Efallai fod gan Lauren y cefnogwyr cartref ar ei hochr hi, ond mae gen i wlad y tu ôl i mi hefyd," meddai Pineiro.
"Dwi'n dod er mwyn mynd â'r beltiau yn ôl i Puerto Rico."
Byddai buddugoliaeth i Price ei harwain ar y trwydydd i ddal y pedwar teitl byd.
Fe wnaeth fynychu'r ornest rhwng Mikaela Mayer a Sandy Ryan yn Las Vegas ym mis Mawrth, gyda Mayer yn amddiffyn ei theitl WBO pwysau welter.
Fe fydd y frwydr nos Sadwrn yn cael ei darlledu yn fyw ar y BBC Two o 20:00 ymlaen nos Sadwrn.
