Tymheredd uchaf y DU ger Aberystwyth ar ddiwrnod poetha'r flwyddyn hyd yma
Yng Ngogerddan ar gyrion Aberystwyth roedd hi boethaf yn y Deyrnas Unedig ddydd Mercher wedi i'r tymheredd godi i 20.9C.
Dyma'r diwrnod cynhesaf eleni, hyd yn hyn.
Ac roedd Porthmadog yng Ngwynedd a Thrawsgoed i'r de o Aberystwyth ymhlith yr ardaloedd poethaf hefyd sef 20.1C ac 19.5C am 14:00.
Yn ol Grahame Madge o'r Swyddfa Dywydd, mae'r tymheredd wedi codi'n sydyn oherwydd aer poeth sydd wedi ymledu o'r de.
Ond does dim disgwyl iddi barhau yn gynnes.
Ychwanegodd Mr Madge: "Rydym yn aml yn gweld hyn yr adeg hon o'r flwyddyn. Ond rwy'n credu mai dyma fydd y tymheredd uchaf am y tro - dydyn ni ddim yn disgwyl record arall yn yr wythnosau nesaf."
Ond a hithau'n gynnar yn y gwanwyn, mae disgwyl i'r tymheredd ddisgyn dipyn dros nos, gyda llwydrew mewn ambell ardal.
Yn nhermau meteorolegol yn y Deyrnas Unedig, mae'r gwanwyn yn dechrau ar 1 Mawrth ac yn gorffen ar 31 Mai.
