Mae Prif Weinidog y DU, Syr Keir Starmer wedi ei dweud ei fod yn fodlon  ymladd am ei swydd ar ôl i'w bennaeth staff ymddiswyddo yn sgil sgandal Peter Mandelson.

Yn ddiweddarach ddydd Llun, fe fydd Starmer yn cyfarfod ag ASau Llafur yn breifat yn ystod cyfarfod wythnosol Seneddol Llafur.

Fe ddywedodd Morgan McSweeney, sydd erbyn hyn yn gyn-bennaeth staff Syr Keir ei fod yn cymryd "cyfrifoldeb llawn" am benodiad Mandelson fel llysgennad Prydain ar gyfer yr Unol Daleithiau.

Cafodd Mandelson ei ddiswyddo ym mis Medi'r llynedd yn sgil gwybodaeth newydd am ei berthynas gyda'r troseddwr rhyw, Jeffrey Epstein.

Mae honiadau wedi dod i'r amlwg fod Peter Mandelson wedi trosglwyddo gwybodaeth sensitif i Epstein. Roedd yn weinidog yn Llywodraeth Lafur Gordon Brown ar y pryd.

Daw hyn ar ôl i Adran Gyfiawnder America gyhoeddi mwy na thair miliwn o ddogfennau yn ymwneud ag Epstein ddiwedd mis Ionawr.

Ddydd Sul fe ddywedodd McSweeney fod rhoi'r swydd llysgennad i Mandelson wedi bod yn "niweidio ein plaid, ein gwlad ac ymddiriedaeth mewn gwleidyddiaeth ei hun."

Fe wnaeth Starmer ymateb i ymddiswyddiad ei bennaeth staff trwy ddweud ei fod yn "ddyledus iddo" am ei waith gyda'r blaid Lafur.

Y gred yw bod y Prif Weinidog ac Mc Sweeney wedi penderfynu ar y cyd ei bod hi'n amser iddo roi'r gorau i'w swydd.

Mae rhai ASau Llafur i'r chwith o'r blaid gan gynnwys Brian Leishman, Ian Byrne a Kim Johnson wedi dweud bod hi'n amser i Starmer hefyd adael rhif 10.

Yn y Times mae dau weinidog yn y Cabinet wedi dweud bod Syr Keir yn "wannach" ac y gallai "gamu lawr unrhyw funud". Ond yn ôl rhif 10 dyw hynny yn "bendant ddim yn wir".

Mae penaethiaid Undebau hefyd wedi bod yn rhoi pwysau arno i fynd gydag Ysgrifennydd Cyffredinol Undeb Brigadau Tân , Steve Wright yn dweud y dylai ymddiswyddo.

Mynnu bod rhaid iddo fynd hefyd mae'r gwrthbleidiau. 

Llun: Peter Nicholls/PA