Cannoedd yn bresennol yn angladd 'Mani' o'r Stone Roses
Yn ei angladd fore Llun, dywedodd canwr y Stone Roses, Ian Brown fod ei gyd-aelod, Gary 'Mani' Mounfield fel "brawd" iddo.
Bu farw'r gitarydd bas fis Tachwedd yn 63 oed.
Cyrhaeddodd Ian Brown Gadeirlan Manceinion yng nghwmni enwau mawr roc a phop y 90au.
Roedd Paul Weller a Bez, o'r Happy Mondays yn eu plith, ac roedd Liam Gallagher yn un o'r galarwyr a gludodd ei arch allan o'r gadeirlan.
Roedd Mounfield yn un o aelodau gwreiddiol y grŵp, gan chwarae ar ddau albwm y Stone Roses cyn dychwelyd i gael aduniad ar eu taith nhw yn 2012.
Fe ymunodd â band arall, Primal Scream, ym 1996 gan chwarae gyda nhw am 15 mlyned
Yn yr angladd hefyd, roedd cyn-chwaraewyr Manchester United, David Beckham a Gary Neville.
Daeth cannoedd o ffans ynghyd y tu allan i'r gadeirlan gan gymeradwyo wrth i'r arch gael ei chludo i'r adeilad, tra roedd cân The Stone Roses 'I Wanna Be Adored' i'w chlywed.
Wrth oedi am eiliad y tu allan i'r gadeirlan, dywedodd Ian Brown ei fod yno i "ddathlu bod dynol hyfryd".
"Roedd e'n bopeth i fi, yn frawd i fi," meddai.
Roedd arch Mounfield wedi ei haddurno mewn gwaith celf sydd ar glawr albwm cyntaf The Stone Roses a gafodd ei gyhoeddi yn 1989.
Bu farw ddwy flynedd wedi iddo golli ei wraig, Imelda a fu farw ar ôl dioddef o ganser.
Mae gan y ddau efeilliaid - brodyr sy'n 13 oed.
Llun: PA / Danny Lawson.
