"Grŵp da iawn, dwi'n meddwl mae'n un fydd Cymru yn gallu gwneud yn dda ynddo".

Dyna sut mae cyn ymosodwr Cymru Robert Earnshaw yn disgrifio grŵp posib Cymru yng Nghwpan y Byd 2026.

Fe fydd tîm Craig Bellamy yn wynebu Canada, Qatar a'r Swistir yn eu grŵp os ydyn nhw'n llwyddo i sicrhau eu lle yn y gystadleuaeth.

Bydd angen iddyn nhw guro Bosnia a Herzagovina a'r Eidal neu Ogledd Iwerddon cyn gallu meddwl hawlio eu lle yng Nghwpan y Byd.

Pe bai Cymru yn cyrraedd y gystadleuaeth, bydd eu gemau yn cael eu chwarae yn Toronto, Los Angeles a Seattle.

Felly wrth i gefnogwyr Cymru freuddwydio am daith i Ogledd America, pwy yn union ydy gwrthwynebwyr posib Cymru?

Atgofion Euro 2020

Y Swistir bydd ffefrynnau i ennill y grŵp, er eu bod nhw ym Mhot 2.

Maen nhw fel arfer yn cyrraedd ail rownd prif gystadlaethau, gan gynnwys rownd yr wyth olaf yn Euro 2024.

Mae ganddyn nhw chwaraewyr o safon sydd yn chwarae yn rhai o gynghreiriau gorau Ewrop, gan gynnwys Granit Xhaka sydd yn chwarae i Sunderland, cyn amddiffynnwr Manchester City, Manuel Akanki ac ymosodwr Rennes yn Ffrainc, Breel Embolo.

Y tro diwethaf i Gymru chwarae yn erbyn Y Swistir oedd yn Ewro 2020.

Kieffer Moore sgoriodd unig gôl Cymru wrth iddyn nhw sicrhau gêm gyfartal yn erbyn eu gwrthwynebwyr.

Fe aeth Cymru ymlaen i ennill yn erbyn Türkiye a cholli yn erbyn yr Eidal, cyn colli 4-0 yn erbyn Denmarc yn rownd yr 16 olaf.

Dim ond dwywaith mae Cymru wedi curo'r Swistir, y tro diwethaf oedd yn 2021. 

Image

'Gobeithio gweld chi yng Nghwpan y Byd'

Canada yw prif ddetholion y grŵp, ond mae hynny gan eu bod nhw'n un o'r tair gwlad sydd yn cynnal Cwpan y Byd y flwyddyn nesaf.

Roedd Cymru a Chanada wedi cwrdd yn Abertawe yn gynharach eleni, gyda'r ymwelwyr yn ennill 1-0 yn erbyn tîm ifanc Cymru.

Ar ôl y gêm roedd Craig Bellamy ddim yn hapus gyda'r ffordd roedd Canada yn dathlu.

"Dwi'n gweld nhw'n dathlu ar y diwedd, a dwi'n meddwl 'dwi'n gobeithio gweld chi yng Nghwpan y Byd. Dwi'n gobeithio gweld chi eto'," meddai.

Pe bai Cymru'n cymhwyso ar gyfer Cwpan y Byd, dyma fydd y tro cyntaf i'r ddau dîm chwarae yn erbyn ei gilydd mewn gêm gystadleuol.

Gemau cyfeillgar yn unig sydd wedi eu chwarae rhwng y ddwy wlad hyd yma, gyda Chymru'n ennill dwy a Chanada'n ennill dwy.

Mae Canada yn rhif 26 ar restr detholion y byd, yr uchaf mae'r wlad erioed wedi cyrraedd.

Eu capten ac amddiffynnwr Bayern Munich, Alphonso Davies yw un o brif chwaraewyr Canada, ond ar hyn o bryd mae'n dal i ddioddef anaf hirdymor i'w ben-glin.

Ymosodwr Juventus, Jonathan David yw'r bygythiad mawr yn yr ymosod.

Image

Ansicrwydd Qatar

Bydd gan aelodau'r Wal Goch atgofion o Qatar wedi i filoedd heidio draw i'r wlad yn 2022 pan gymhwysodd Cymru ar gyfer Cwpan y Byd.

Ar y cae mae'r gwledydd ond wedi cwrdd unwaith, a hynny yn 2000 yn ystod gêm gyntaf Mark Hughes fel rheolwr.

Dyma Gwpan y Byd cyntaf i Qatar gymhwyso amdano heb fod y wlad sydd yn cynnal y gystadleuaeth.

Maen nhw'n rhif 51 ar restr detholion y byd, ac wedi ennill Cwpan Asia yn 2023.

Mae eu carfan i gyd yn chwarae i glybiau yn Qatar, ac felly mae elfen o ansicrwydd a dyfalu am eu chwaraewyr.

Ond mae ganddyn nhw wyneb cyfarwydd yn rheolwr, sef Julen Lopetegui.

Mae Lopetegui wedi bod yn rheolwr ar Sbaen, Real Madrid, Sevilla, Wolves a West Ham.