Mae Archesgob newydd Cymru wedi dweud y bydd yn "frwydr" i gadw'r Gymundeb Anglicanaidd ynghyd ac nad oedd yn gwybod a fyddai modd gwneud hynny.

Cherry Vann yw arweinydd benywaidd cyntaf yr Eglwys yng Nghymru, yn ogystal â'r cyntaf i fod mewn perthynas gyda pherson o'r un rhyw.

Fe wnaeth ei phenodiad ym mis Gorffennaf ddenu beirniadaeth gan rai lleisiau ceidwadol o fewn y Gymundeb Anglicanaidd.

Dywedodd un corff, Cymrodoriaeth Fyd-eang yr Anglicaniaid Cyffesol (Gafcon), bod ei phenodiad yn "hoelen boenus arall yn arch uniongrededd Anglicanaidd".

Wrth siarad ar raglen Sunday Supplement ar BBC Radio Wales ddydd Sul, dywedodd Y Parchedicaf Cherry Vann ei fod yn “frwydr” i gadw’r Gymundeb Anglicanaidd ynghyd.

Ar hyn o bryd mae’r gymundeb yn cynnwys 47 o eglwysi gwahanol wedi eu gwasgaru ar draws 165 o wledydd gwahanol.

“Dydw i ddim yn gwybod a fydd yn gallu aros gyda’i gilydd,” meddai Cherry Vann.

“Rydw i’n gwybod bod Archesgob newydd Caergaint yn cynnal cyfres o gyfarfodydd. Rydw i’n mynd i un ddydd Mercher i gyflwyno fy hun a cheisio creu gofod lle y gall pawb deimlo yn rhan o’r Gymundeb Anglicanaidd.

“Ond mae’n mynd i fod yn anodd. Ar ddiwedd y dydd dwi’n credu bod angen i nifer o eglwysi ar draws y byd benderfynu drostyn nhw eu hunain ydyn nhw am adael neu aros i mewn.

“Rydw i’n credu y gallwn ni fyw gyda’r gwahaniaethau. Rhan o fod yn Gristion yw byw gydag amrywiaeth a gwahaniaeth, ond eu penderfyniad nhw ydi o yn y pen draw.”

'Positif'

Ychwanegodd: “Mae yna eglwysi ar draws y Gymundeb Anglicanaidd, yn enwedig Pacistan a Nigeria, a rhai o'r gwledydd Affricanaidd eraill sydd wedi gwrthwynebu fy mhenodiad. 

“Roedd hynny i'w ddisgwyl. Nid yw'n rhywbeth y mae pob eglwys yn cytuno ag ef. Nid yw pawb eisiau menywod mewn arweinyddiaeth.”

Ond dywedodd bod y sylwadau o fewn y gymuned yng Nghymru wedi bod yn “hynod o bositif”.

“Dydw i ddim wedi cael dim byd ond sylwadau cadarnhaol,” meddai.

“Mae pobl yn llawenhau am y ffaith mai Cymru yw'r wlad gyntaf yn y DU i gael Archesgob benywaidd. 

“Rydw i'n meddwl ar y cyfan, bod yr eglwys yng Nghymru, a Chymru fel gwlad, wedi bod yn llawenhau'n fawr yn y cam hwn y mae'r eglwys wedi’i gymryd.”