Mae dyn o Abertawe wedi cael dedfryd o 30 mlynedd yn y carchar ar ôl cael ei ganfod yn euog o nifer sylweddol o droseddau rhyw yn erbyn plant.

Dywedodd heddlu'r ddinas fod troseddau Adam Davies, 36 oed, “ymhlith y gwaethaf o'u math” yr oedden nhw wedi eu gweld.

Ym mis Gorffennaf 2023, fe honnodd un o ddioddefwyr Davies ei fod wedi ymosod yn rhywiol arni pan oedd hi'n iau. 

Roedd y dioddefwr yma a dioddefwr arall wedi bod yn dioddef dros nifer o flynyddoedd. Roedd y ddwy ferch o dan 13 oed ar adeg y gamdriniaeth.

Fel rhan o'r ymchwiliad i'r honiad fe gafodd dyfeisiau Davies eu cymryd gan yr heddlu er mwyn eu harchwilio, a daethpwyd o hyd i luniau o gam-drin plant yn rhywiol, yn cynnwys lluniau o gategori A, B ac C ar ei gyfrifiadur.

Ym mis Ebrill 2025, datgelodd dioddefwr gwrywaidd, fod Davies wedi ei gam-drin yn rhywiol pan oedd rhwng 6 ac 8 oed.

Plediodd Davies yn ddieuog i restr hir o droseddau, ond fe'i cafwyd yn euog yn y llys o 21 o gyhuddiadau, yn cynwys pedwar cyhuddiad o dreisio plentyn dan 13 oed, saith achos o ymosod yn rhywiol ar blentyn dan 13 oed, a dau gyhuddiad o annog plentyn o dan 13 oed i gymryd rhan mewn gweithgarwch rhywiol.

Fe'i gafwyd hefyd yn euog o fod â lluniau anweddus o blentyn yn ei feddiant.

Mae Davies wedi cael dedfryd estynedig o 30 mlynedd yn y carchar, a bydd yn treulio o leiaf  18 mlynedd dan glo.

Bydd yn droseddwr rhyw cofrestredig am weddill ei oes, ac yn destun Gorchymyn Atal Niwed Rhywiol.

'Afiach'

Dywedodd y Ditectif Gwnstabl Stacey Jones: “Mae troseddau Adam Davies ymhlith y gwaethaf o'u math yn Abertawe. 

“Cymerodd fantais o sawl plentyn mewn ffordd afiach i gyflawni gweithredoedd erchyll er mwyn ei bleser rhywiol anfoesol ei hun.

“Mae'n berygl aruthrol i blant, ac mae'r strydoedd yn llawer iawn mwy diogel i bobl ifanc nawr ei fod wedi cael ei anfon i'r carchar am gyfnod sylweddol iawn.

“Nid oedd Adam Davies yn poeni dim am sut y byddai ei droseddau yn effeithio ar fywydau ei ddioddefwyr, yn feddyliol ac yn gorfforol.

“Rydym yn rhoi teyrnged i ddewrder eithriadol y dioddefwyr a roddodd wybod i ni, ac yn gobeithio y gallant symud ymlaen gyda'u bywydau, gan wybod na allai Adam Davies gysylltu â nhw mwyach.”