Mae dynes 33 oed o Ben-y-groes yng Ngwynedd wedi’i charcharu am dros flwyddyn ar ôl ffugio negeseuon bygythiol gan gyn-gariad ei phartner.

Fe gafodd Rebecca Louise Jones, o Drem Engan, Pen-y-groes, ei dedfrydu yn Llys y Goron Caernarfon ar 20 Tachwedd ar ôl cyfaddef i wyrdroi cwrs cyfiawnder.

Ym mis Mawrth 2023, dywedodd Jones a’i phartner eu bod yn cael eu haflonyddu gan gyn-bartner y dyn, gan honni eu bod yn derbyn nifer o negeseuon sarhaus a bygythiol bob dydd.

Cafodd cyn-bartner y dyn ei harestio, ond dywedodd hi fod y cyhuddiadau’n rhai maleisus a bod y dystiolaeth yn ei herbyn yn ffug.

Yn dilyn ymchwiliad, fe wnaeth yr heddlu ddarganfod mai Jones ei hun oedd yn anfon y negeseuon sarhaus gan ddefnyddio nifer o gyfrifon ffug.

Cafodd ei charcharu am flwyddyn a 10 mis, ac fe dderbyniodd orchymyn atal amhenodol hefyd i amddiffyn y dioddefwr.

Dywedodd y Ditectif Gwnstabl Emily Shone: “Cafodd ymddygiad Rebecca Jones effaith ddinistriol ar y dioddefwr, gan achosi iddi gael ei gwahardd o’i swydd a theimlo nad oedd hi’n gallu gadael ei thŷ ar ei phen ei hun.

“Bydd y profiad hwn yn parhau i gael effaith barhaol arni, ond rwy’n gobeithio y bydd y ddedfryd yn rhoi rhywfaint o sicrwydd i’r dioddefwr na fydd yn digwydd eto.”