Mae’r seren bop Charli XCX wedi awgrymu ei bod wedi cydweithio gyda'r Cymro John Cale o'r band The Velvet Underground gynt, a hynny ar gyfer cân i'r ffilm newydd Wuthering Heights.

Yn dilyn llwyddiant ei halbwm Brat, cyhoeddodd y gantores 33 oed ei bod hi’n ysgrifennu’r gân ar gyfer addasiad Emerald Fennell o’r nofel gan Emily Brontë.

Ddydd Iau, rhannodd glip 10 eiliad o'i chân newydd, House, a fydd yn cael ei rhyddhau ar 10 Tachwedd ac sy'n cynnwys cyd-sylfaenydd y band roc o'r 60au.

Wrth sôn am y broses o ysgrifennu'r gân, dywedodd y gantores ar ei chyfrif Instagram: "Ar ôl bod mor ddwfn yn fy albwm flaenorol roeddwn i’n gyffrous i ddianc i rywbeth hollol newydd, hollol wahanol.

"Pan fydda i'n meddwl am Wuthering Heights, rwy’n meddwl am lawer o bethau. Rwy’n meddwl am angerdd a phoen. 

"Rwy’n meddwl am Loegr. Rwy’n meddwl am y Moors, rwy’n meddwl am y mwd a’r oerfel. Rwy’n meddwl am benderfyniad a dygnwch."

'Cain a chreulon'

Dywedodd Charli XCX ei bod wedi cael ei hysbrydoli gan raglen ddogfen Todd Haynes o 2021 am The Velvet Underground a’r ffordd y disgrifiodd Cale angen y band i gael caneuon a oedd yn "gain ac yn greulon".

"Wrth weithio ar gerddoriaeth ar gyfer y ffilm hon, roedd ‘cain a chreulon’ yn ymadrodd yr oeddwn yn dod yn ôl ato’n gyson," meddai.

"Pan ddaeth yr haf i ben roeddwn i’n dal i fyfyrio ar eiriau John. Felly penderfynais gysylltu ag o i gael ei farn ar y caneuon yr oedd ei ymadrodd wedi’u hysbrydoli mor ddwfn, ond hefyd i weld a fyddai eisiau cydweithio ar unrhyw rai.

"Fe wnaethon ni gysylltu, fe wnaethon ni siarad ar y ffôn a waw... ei lais, mor gain, mor greulon."

Fe aeth ymlaen i ddweud eu bod wedi dechrau trafod syniadau gyda'i gilydd.

"Fe nes i anfon caneuon ato ac fe wnaethon ni ddechrau siarad yn benodol am House. Fe wnaethon ni siarad am y syniad o gerdd," meddai.

"Recordiodd rywbeth a’i anfon ataf. Rhywbeth y gallai ond John ei wneud. Ac roedd… wel, fe wnaeth i mi grio."