Mae arwydd enfawr mewn steil Hollywood wedi cael ei godi yn Wrecsam.

Cafodd sawl llun o’r arwydd newydd, sydd wedi ei leoli ar Fanc Y Bers, eu rhannu ar y cyfryngau cymdeithasol dros y penwythnos.

Ar Trydar, dywedodd y clwb pêl-droed mai “ateb Ewrop i Hollywood” fuodd Wrecsam erioed. 

Daw hyn wrth i gysylltiad y dref gyda Hollywood barhau wedi i’r sêr Ryan Reynolds a Rob McElhenney gymryd rheolaeth dros Glwb Pêl-Droed Wrecsam y llynedd.

Wythnos diwethaf, fe gafodd rhai o weithwyr argyfwng ac elusennol y dref y cyfle i wylio ffilm ddiweddaraf Ryan Reynolds am ddim. 

Mae Clwb Pêl-Droed Wrecsam hefyd wedi dweud ei fod wedi gweld galw “digynsail” am docynnau tymor ers i’r enwogion brynu’r clwb ym mis Chwefror, gyda chefnogwyr yn ciwio dros nos i gael gafael arnynt.

Wrth geisio am reolaeth dros y clwb, fe ddywedodd Reynolds a McElhenney eu bod nhw’n dymuno ei droi yn “rym rhyngwladol".

Maen nhw hefyd wedi addo ystyried adnewyddu’r Cae Rasio, sef cartref y clwb pêl-droed, a sicrhau “ambell gig Tom Jones".